मृतक बालिकाका पिता ऋषिमुनि कानू ।
परवानीपुर, ३० वैशाख/ गत वैशाख २५ गते वीरगंज–कलैया सडकखण्ड अन्तर्गतको बहुअरीमा भएको सडक दुर्घटनामा मृत्यु भएकी छ वर्षीया बालिकाको घटनामा कारचालकले मादक पदार्थ सेवन गरेको प्रहरीले जनाएको छ ।
बारा, सिम्रौनगढ नगरपालिका–९ बसवरिया बस्ने हवलदार मुकेशप्रसाद यादवले मापसे गरी उक्त कार तीव्र गतिमा चलाएकाले दुर्घटना भएको प्रहरीको प्रारम्भिक अनुसन्धानले जनाएको छ ।
कलैयाबाट वीरगंज आउँदै गरेको डिएल१सिएच २३६० भारतीय नम्बरको कारले परवानीपुर गाउँपालिका–५ एलएस न्युरो अस्पतालअगाडि सोही स्थानकी ऋषिमुनि साह कानूकी छ वर्षीया छोरीलाई दिउँसो २ः१५ बजे ठक्कर दिएको थियो । कार तीव्र गतिमा भएको कारण बालिका सडकको दक्षिणतर्पmको नालामा ठक्कर लागेर खसेकी थिइन् र कारको दुवै चक्का पड्केर उत्तरतर्फको नालामा खसेको थियो । कारमा सवार भारत, बिहार, मोतीहारी, भदहज बस्ने २७ वर्षीय मनीषकुमार यादव, मुकेशको फुपूका छोरा हुन् । मनीष र मुकेश कलैयाबाट मापसे गरी वीरगंज आइरहेका थिए ।
यस घटनामा दुवैजना अहिले प्रहरी हिरासतमा छन् । परिवारजनले ज्यान मार्ने उद्योग मुद्दामा जाहेरी दिएर कारबाईको लागि माग गरेका छन् ।