काठमाडौँ I प्रतिनिधिसभाको आजको बैठकबाट प्रधानमन्त्री पुष्पकमल दाहाल प्रचण्डले विश्वासको मत प्राप्त गर्नु भएको छ ।
प्रमुख प्रतिपक्षी लगायतका प्रतिपक्षीदहरुको विरोधकाबीच प्रधानमन्त्री प्रचण्डले राख्नु भएको विश्वासको मत प्रतिनिधि सभाको बहुमतले पारित गरेको हो ।
विश्वासको मतको प्रस्तावको पक्षमा १५७ मत परेको थियो भने विपक्षमा शुन्य र मत दिन्न भन्ने पक्षमा जम्मा १ मत परेको थियो । विश्वासको मतको प्रस्तावमाथि प्रमुख प्रतिपक्ष कांग्रेस लगायतका केही प्रतिपक्षदलका सांसदहरुले भने मतदान गर्नु भएन ।
प्रस्तावको पक्षमा नेकपा एमाले, नेकपा माओवादी केन्द्र, राष्ट्रिय स्वतन्त्र पार्टी, नेकपा एकीकृत समाजवादी र हालै विभाजित भएर गठित जनता समाजवादी पार्टी, जनमत पार्टी र केही स्वतन्त्र सांसदहरुले समर्थन जनाउनु भएको थियो ।
मतदानमा १५८ सांसदहरुले भाग लिनु भएको थियो ।
प्रस्तावमाथि मतदान जारी रहँदा प्रमुख प्रतिपक्षी नेपाली कांग्रेस लगायतका प्रतिपक्षी दलका सांसदहरुले नाराबाजीसहित विरोध जनाइरहनुभएको थियो ।
प्रमुख प्रतिपक्षी दल नेपाली कांग्रेस लगायतका प्रतिपक्षी दलहरूले उपप्रधानमन्त्री एवं गृहमन्त्री रवि लामिछानेले सहकारीको रकम हिनामिना गरेको भन्दै संसदीय समिति गठनको माग राख्दै संसद्को बैठक अवरुद्ध गर्दै आइरहेको छ ।
