धनकुटा । धनकुटामा जिल्लास्तरीय अन्डर १५ बुद्धिचाल प्रतियोगिता बुधबारदेखि सुरु भएको छ ।
बिहीबारसम्म सञ्चालन हुने प्रतियोगितामा धनकुटाका विभिन्न विद्यालयमा अध्ययनरत विद्यार्थीको सहभागिता रहेको छ । जसमा २९ पुरुष र ६ महिला गरी ३५ खेलाडीको सहभागिता रहेको छ ।
जिल्ला खेलकुद विकास समितिको आयोजना तथा जिल्ला बुद्धिचाल संघ धनकुटाको संयोजनमा भएको प्रतियोगिताको धनकुटाका प्रमुख जिल्ला अधिकारी पुण्यविक्रम पौडेलले उद्घाटन गर्नुभयो ।
त्यस क्रममा प्रजिअ पौडेलले बुद्धिचाल पनि व्यावसायिक रुपमा अघि बढिरहेको बताउँदै बजार तथा ग्रामीण स्तरबाट बुद्धिचालका लागि खेलाडी उत्पादन गरिनुपर्नेमा जोड दिनुभयो ।
जिल्ला स्तरीय प्रतियोगिताबाट प्रदेश स्तरीय प्रतियोगितामा सहभागिता जनाउन २ जना पुरुष र २ जना महिला छनौट गरिने जिल्ला बुद्धिचाल संघ धनकुटाका अध्यक्ष रमेशचन्द्र अधिकारीले बताउनुभयो ।
