परवानीपुर, ३ असार/ वीरगंजस्थित कृषि औजार अनुसन्धान केन्द्रले सोमवार जलवायुमैत्री कृषि प्रविधिबारे एक दिने तालीम किसानहरूलाई दिएको छ।
केन्द्रमा आयोजित तालीममा पर्सा, बाराका किसानहरूलाई सुक्खायाम र हिले मौसममा झरुवा धान र बेर्ना तयार गरी ट्याक्टरबाट धान रोप्ने विधि र झारपात व्यवस्थापन गर्नेबारे जानकारी गराइएको थियो।
कार्यालय प्रमुख सचिन मिश्रले सुक्खा र हिले मौसममा कसरी धान रोप्ने भन्नेबारेमा किसानहरूलाई जानकारी गराउने उद्देश्यले तालीम आयोजना गरिएको बताए। उनले कृषि उपकरणबाट धान रोपाइँ गर्दा ज्याला मजदूरीमा खर्च कम हुने र समयको पनि बचत हुने हुँदा कृषि प्रविधिबारे जानकारी गराइएको बताए।
सहभागी किसानहरूलाई इन्जिनीयर विकास केसी, द्वारिका चौधरी, सुनील सहनी र कैलाश भुडेलले धानखेती र प्रविधिबारे प्रशिक्षण दिएका थिए।