वीरगंज, २७ साउन/ शनिवार एकजना महिलाको शङ्कास्पद मृत्यु भएको छ । वीरगंज–१८ सुखचैनामा बस्ने ३० वर्षीया सुगन्धा रौनियार हिजो घरमा पासो लगाएको अवस्थामा मृत फेला परेकी थिइन् । चार वर्षअगाडि उनको अन्तरजातीय प्रेम विवाह भएको थियो । उनका दुई सन्तान छन् ।
घरायसी कलहले आत्महत्या गरेको हुन सक्ने प्रारम्भिक अनुमान गरिएको छ । प्रहरीले हिजो दिउँसो खबर आएपछि अनुसन्धान गरी शव शल्यपरीक्षणपछि आइतवार परिवारलाई जिम्मा लगाएको जनाएको छ ।
प्रहरीले घटना शङ्कास्पद भएको र सोबारे अनुसन्धान भइरहेको जनाएको छ । प्रहरीले बिहान ९ बजे आत्महत्या गरेको घटनाबारे दिउँसो २ बजे खबर भएकोमा आशङ्का उब्जिएको जनाएको छ । जिल्ला प्रहरी कार्यालय, पर्साका प्रवक्ता प्रहरी नायब निरीक्षक दीपक भारतीले प्रारम्भिक चरणमा घटना आत्महत्या जस्तै भएपनि अनुसन्धान अगाडि बढाउने बताएका छन् । उनले हालसम्म सो घटनामा कोही पक्राउ नपरेको बताए ।