सिड्नी, २८ चैत, चाहे त्यो जोडले बग्ने छाल होस्, मानिस खाने गोही होस् वा शिकारी शार्क होस् – अस्ट्रेलियालीहरू पानीको नजिक रहँदा आफ्ना आँखा खुला राख्न बानी परेका छन् । अहिले सिड्नीको एक तटीय क्षेत्रका बासिन्दाहरूलाई एउटा भागेको विदेशी सर्पका लागि पनि सावधान रहन भनिएको छ । अधिकारीहरूले बिहीवार सिल्भानियाको तटीय क्षेत्रको उपनगर वरिपरि घुम्दै गरेको ‘बोआ कन्स्ट्रिक्टरको अवलोकनवारे सचेत गराइएको’ बताएका छन् । “कृपया जनावरको नजिक नजानुहोस”, न्यु साउथ वेल्स (एनएसडब्लु) को प्राथमिक उद्योग विभागले एक विज्ञप्तिमा भनेको छ, “यदि सुरक्षित भएमा, एउटा फोटो लिनुहोस् र हामीलाई सम्पर्क गर्नुहोस् ताकि हामी सर्पको पहिचान गर्न र पक्रन प्रयास गर्न सकौँ ।” सामाजिक सञ्जालमा पोस्ट गरिएको भिडियोमा ठूलो आकारको जीव एक समुद्री किनाराको छेउको पैदल मार्गमा बिस्तारै घस्रिँदै गरेको देखाइएको छ । मध्य र दक्षिण अमेरिकामा पाइने बोआ कन्स्ट्रिक्टर विश्वका सबैभन्दा ठूला सर्प प्रजातिहरू मध्ये एक हो । तिनीहरूको औसत लम्बाइ लगभग तीन मिटर (१० फिट) हुन्छ र तिनीहरूले आफ्नो शिकारलाई कसरी निचोरेर मार्छन् भन्ने तरिकाबाट नामकरण गरिएको हो । धेरै सर्प प्रेमीले बोआ कन्स्ट्रिक्टरलाई अनौठो घरपालुवा जनावरका रूपमा राख्न चाहन्छन् । “बोआ कन्स्ट्रिक्टर अस्ट्रेलियाको स्थानीय प्रजाति होइन र यो एनएसडब्लु र अस्ट्रेलियाभर विस्तृत वातावरणमा जनसंख्या स्थापना गर्ने उच्च जोखिममा छ”, एनएसडब्लु प्राथमिक उद्योग विभागले भनेको छ, “यो सर्पलाई संसारभरि घरपालुवा जनावरको व्यापारका लागि कानूनी र अवैध रूपमा पालिएको र राखिएको छ ।” (रासस/एएफपी)