परवानीपुर, ३१ जेठ/
कलैया उपमहानगरपालिका–१४ बघवनमा केटाकेटीको विषयलाई लिएर ५० वर्षीय नन्दुराउत कुर्मीको हत्या भएको छ ।
स्थानीय उमेश जयसवालसहित उनका परिवारजन मिलेर कुर्मीलाई कुटपिट गरेर हत्या गरेको बारा प्रहरीले जनाएको छ ।
केटाकेटीको विवादमा जयसवाल परिवारले जेठ २९ गते साँझ स्थानीय उमेश कलवारको राइस मिलमा काम गर्ने कुर्मीलाई मिलबाट समातेर लगी कुटपिट गरेका थिए ।
कुटपिटबाट घाइते कुर्मीलाई उपचारका लागि प्रादेशिक अस्पताल कलैया पुर्याइएको र त्यहाँका चिकित्सकले उनलाई मृत घोषित गरेका थिए ।
घटनाको भोलिपल्ट कुर्मीका परिवारजनले जिल्ला प्रहरी कार्यालय, बारामा उमेश जयसवाल, निजकी पत्नी रञ्जु जयसवाल र छोराहरू अमित, सुमित र सुजित जयसवाल तथा उमेशका मामाको छोरा दिगम्बर जयसवालविरुद्ध किटानी जाहेर दिएका थिए ।
बारा प्रहरी प्रमुख सन्तोष तामाङले दिगम्बरलाई पक्राउ गरेको र अन्य पाँचजना घर छाडी भागेकामा उनीहरूको खोजी कार्य जारी रहेको बताए ।
