वीरगंज, २९ असार । मधेश प्रदेशका उद्योग, वाणिज्य तथा पर्यटन मन्त्री ई. वसन्त कुशवाहाले मधेश प्रदेशका आठवटै जिल्ला प्रशासन कार्यालयलाई परिपत्र गर्दै भारतीय पर्यटकलाई सहजीकरण गर्न निर्देशन दिएका छन् ।
मन्त्री कुशवाहाले सप्तरी, सिरहा, धनुषा, महोत्तरी, सर्लाही, रौतहट, बारा र पर्साका जिल्ला प्रशासन कार्यालयलाई पठाएको पत्रमा भारतीय सीमा नाकाबाट नेपाल घुम्न आउने पर्यटकहरूलाई सुरक्षा चेकजाँच लगायतका नाममा अनावश्यक झन्झट दिइने तथा उचित व्यवहार नहुने जस्ता गुनासोहरू प्राप्त भएको उल्लेख छ । भारतबाट आउने पर्यटकहरूलाई आवश्यक सहजीकरण गर्न र गराउन व्यवस्था मिलाउनसमेत उनले अनुरोध गरेका छन् ।
मधेश प्रदेशमा भारतीय पर्यटकको आगमन बढाउन र पर्यटन क्षेत्रको विकास र स्थानीय अर्थतन्त्रमा सकारात्मक प्रभाव पार्ने पत्रमा जनाइएको छ । सो पत्रको बोधार्थ गृह मन्त्रालय (सिंहदरवार, काठमाडौं), मधेशका मुख्यमन्त्री तथा मन्त्रिपरिषद्को कार्यालय, गृह, सञ्चार तथा कानून मन्त्रालयलाई समेत दिइएको छ ।