वीरगंज, २१ साउन । वीरगंज महानगरपालिका–१६ को नगवास्थित गणेश टोलमा खानेपानीको चरम सङ्कट झेलिरहेका स्थानीयवासीको नेपाल सरकारका खानेपानी मन्त्री प्रदीप यादवको निर्देशनमा डीप बोरिङ जडान गरिएको छ । भूसतहको पानी सुक्दा चापाकलहरूले काम गर्न छोडेपछि पानीको सङ्कटमा परेका स्थानीयवासीको समस्यालाई मध्यनजर गर्दै स्थानीय युवा नेता अरूण यादवको पहलमा मन्त्री यादवले निर्देशन दिएपछि डीप बोरिङ जडान गरिएको हो । नयाँ जडान भएको डीप बोरिड्ढो उदघाटन हिन्दु धर्म संस्कृति अनुसार पूजापाठ गरी सम्पन्न भएको मन्त्री यादवका स्वकीय सचिव हरिन्द्र साहले जानकारी दिए । साहका अनुसार, डीप बोरिङबाट पानी वितरणका लागि पाइपलाइन विस्तारको कार्य पनि आजैबाट शुरू भएको छ । बोरिङबाट कम्तीमा एक सयभन्दा बढी परिवारलाई स्वच्छ खानेपानी उपलब्ध हुने अपेक्षा गरिएको साहले बताए । डीप बोरिङ जडानसँगै नजिकै दुर्ई हजार लिटर क्षमताको खानेपानी ट्यांकी पनि स्थापना गरिने योजना रहेको सचिव साहले बताए । ट्यांकीले पानी भण्डारण र वितरणलाई थप सहज बनाउने विश्वास गरिएको छ । डीप बोरिङ जडान र पाइपलाइन विस्तारको कार्यले गणेश टोलका बासिन्दामा उत्साह छाएको छ । स्थानीयवासीले पानीको नियमित आपूर्ति हुने भएपछि आफूहरूको दैनिक जीवन सहज हुने अपेक्षा गरेका छन् । साथै, उनीहरूले यस्ता जनमुखी कार्यलाई निरन्तरता दिन मन्त्री यादवसँग आग्रह गरेका छन् । स्थानीयवासीहरूले डीप बोरिङ जडानले आफूहरूको दैनिक जीवनमा ठूलो राहत पुग्ने भन्दै खुसी पनि व्यक्त गरेका छन् । स्थानीय पाशपति देबी जयसवालले भनिन, “पानीको सङ्कटले हाम्रो दैनिकी निकै कठिन भएको थियो । खानेपानी मन्त्री प्रदीप यादवज्यूको निर्देशनमा यति छिटो बोरिङ जडान भएर हाम्रो समस्या समाधान भएको छ । हामी उहाँप्रति ह्दयदेखि आभारी छौँ ।” त्यस्तै स्थानीय राहुल गिरीले पनि मन्त्री यादवको तदारूकता र छिटो–छरितो कार्यशैलीको प्रशंसा गर्दै कार्यले समुदायमा ठूलो परिवर्तन ल्याएको बताए । मन्त्री यादवका स्वकीय सचिव साहका अनुसार, मन्त्री यादवको कार्यकालमा वीरगंज महानगरपालिकालगायत पानीको सङ्कट झेलिरहेका पर्सा जिल्लाका विभिन्न स्थानीय तहहरूमा हालसम्म तिन सय भन्दा बढी डीप बोरिङ जडान भइसकेका छन् । बोरिङहरूले हजारौँ परिवारलाई स्वच्छ खानेपानीको पहुँच सुनिश्चित गरेको छ । उनले मन्त्रीज्यूको प्राथमिकता नै जनताको आधारभूत आवश्यकता पूरा गर्नु हो । खानेपानीको समस्या समाधानका लागि उहाँले निरन्तर प्रयास गरिरहनुभएको बताए ।