वीरगंज, ९ भदौ । अन्तर्राष्ट्रिय ब्रह्माकुमारी संस्थाका पूर्व मूख्य प्रशासिका राजयागिनी डा. प्रकाशमणी दादीज्यूको १८ औं पुण्य स्मृतिदिवस तथा विश्वबन्धुत्व दिवसको पुनीत अवसरमा श्रध्दाञ्जली एवं योगसाधना कार्यक्रम सम्पन्न भएको छ । करिब १२ वर्ष कै कलिलो उमेरमा ब्रह्माकुमारी संस्थामा प्रवेश गरी राजयोगको गहन साधनालाई आत्मसात गर्दै आफ्नो जीवनकालमा अपरिमित त्याग तपस्या सात्विकता र दिव्य व्यक्तित्व मार्फत करूणा, दया, अहिंसा, विश्व बन्धुत्व र शान्तिको सन्देश विश्वका करिब १३३ राष्ट्रहरूमा फैलाउनु भई तत्कालीन समयमा विश्व नेता नेल्सन मण्डेला, पुज्य दलाई लामा, मदर टेरेसा, इन्दिरा गान्धी, राजीव गान्धी नेपालका तत्कालिन महाराजा विरेन्द्र, नेपालका राष्ट्र सन्त योगी नरहरीनाथ, जगदगुरू शंकराचार्य तथा सैयौँ धर्मगुरू, जगतगुरू, महामण्डलेश्वर, ईसाइ धर्मका प्रधान विसप, विश्व मुश्लिम लिगका प्रधान मैलाना द्वारा दादी अर्थात सबै आध्यात्मिक हस्तीहरूकी ठूली दिदीको उपमाले सम्मानीत हुनुभएको थियो । भारत, नेपाल, श्रीलंका, अमेरिका, माल्दिव्स, बेलायत, अरब, दुबइ, जापान लगायत अनेकै राष्ट्रहरूद्वारा पुज्य हस्तीको रूपमा सम्मानीत हुँदै संयुक्त राष्ट्र संघबाट समेत अन्तर्राष्ट्रिय शान्तिदूत अवार्डले सम्मानीत हुँदै वैश्विक आध्यात्मिक एवं सामाजिक नेतृको रूपमा सारा जगतलाई आफ्नो दिव्य पालना प्रदान गर्नुभएको थियो । उहाँले सन् २००७ अगस्त २५ मा आफ्नो आध्यात्मिक सम्पूर्णता प्राप्त गरी भौतिक देह त्याग गरी महाप्रयाण गर्नु भएको थियो । जुन दिवसलाई विश्वमा विश्व बन्धुत्व दिवसको रूपमा मनाइरहेको छ । यसै सन्दर्भमा यसपाली सोही अवसर पारेर विश्वमा रहेको रगतको अभावलाई पूर्ति गरी मानवताको सेवामा टेवा पुर्याउने संकल्पका साथ भारत नेपाल र केही अन्यदेशहरूमा २२ देखि २५ अगस्त सम्म विशाल अन्तर्राष्टिय रक्तदान शिविरको आयोजना गरी १०० घण्टामा एक लाख पिन्ट रक्त सङ्कलन गरी विश्व कीर्तिमानका लागि विश्व समाज सेवा जगतमा एक अभूतपूर्व स्वर्णिम इतिहास ब्रह्माकुमारी संस्थाले रच्ने समेत लगभग पक्का भईसकेको छ ।