वीरगंज, १३ भदौं । पर्साको पकाहा मैनपुर गाउँपालिका वडा नम्बर २ का अनिलकुमार कुशवाहा ज्यान मार्ने उद्योग मुद्दामा संलग्न भएको अभियोगमा फरार भएका थिए । पछि अदालतमा हाजिर भएर धरौटीमा रिहा भएका छन् ।
करिब एक महिना अघि पर्सा जिल्ला अदालतले उनलाई ७० हजार रुपियाँँ धरौटीमा रिहा गरेको थियो ।
धरौटीमा छुटेका कुशवाहा बिहीवार पुनः पर्सा जिल्ला अदालतकै लेखा शाखामा कर्मचारीको रूपमा हाजिर भएका हुन् ।
मार्ने उद्योग जस्तो गम्भीर मुद्दामा आरोप लागेका व्यक्ति धरौटीमा छुटेर पुनः त्यही अदालतमै कर्मचारीको रूपमा कार्यरत रहेको खुलासा भएको हो । धरौटीमा छुटेपछि मुद्दा खेपिरहेका व्यक्तिलाई पुनः त्यही निकायकै काममा संलग्न गरिनु न्यायिक प्रक्रियाको निष्पक्षतामाथि प्रश्न उठेको छ । वीरगंजका एक अधिवक्ताले भने, ‘आरोप लागेका व्यक्तिलाई सोही कार्यालयमै जिम्मेवारी दिनु न त उचित हो, न त पारदर्शिता कायम हुने अवस्था छ ।’
आफ्नै चलिरहेको मुद्दामा प्रभाव पार्नकै लागि कुशवाहा हाजिर भएको आशंका गरिएको छ । यसरी न्यायिक निकायमै मुद्दा खेपिरहेका व्यक्तिलाई कार्यरत राख्नु भनेको अनुसन्धान र सुनुवाइको निष्पक्षता कमजोर पार्ने सम्भावना हुनसक्ने ती अधिवक्ताले बताए ।
उनले भने,‘ धरौटीमा छुट्नु दोषमुक्त हुनु होइन, केवल थुनामुक्त हुनु मात्रै हो । यस किसिमका संवेदनशील मामिलामा अदालत आफैं बढी सावधान हुनुपने हो ।’
पर्सा जिल्ला अदालतका श्रेस्तेदार प्रभाकर मल्लिकले कुशवाहा लेखा शाखामा कार्यरत भएकाले न्यायिक निकायको मूल निर्णय प्रक्रियासँग प्रत्यक्ष सम्बन्ध नराख्ने बताए । तर, उनको गतिविधि माथि निगरानी गरिने उनले बताए ।
