वीरगंज, १५ भदौ । संघीय सरकारका गृहमन्त्री रमेश लेखकले वीरगंजमा जसरी पनि हैजा नियन्त्रण गरेर छाड्ने बताएका छन् ।
आज राति ८ बजे नारायणी अस्पताल वीरगंजको निरीक्षण गर्दै सरोकारवालाहरुसँगको अस्पतालको सभाकक्षमा भएको छलफल कार्यक्रममा उनले यस्तो बताएका हुन् ।
गृहमन्त्री लेखकले भने, “केन्द्रीय सुरक्षा समितिमा र मन्त्रिपरिषदबाट हैजा नियन्त्रणको लागि आवश्यकता भएको आधारमा नेपाल प्रहरी, सशस्त्र प्रहरी वा नेपाली सेनाको समेत चिकित्सक र स्वास्थ्यकर्मी जुन बेला पनि परिचालन गर्न सकिने निर्णय समेत भइसकेको छ । तसर्थ काठमाडौंमा जसरी वीरगंजमा हैजा आउटब्रेक भइरहेको समाचार सम्प्रेषण भइरहेको छ, स्थलगत रुपमा हेर्दा त्रसित हुने अवस्था छैन । नारायणी अस्पतालका स्वास्थ्यकर्मीहरुले राम्रो काम गरिरहनु भएको छ” भन्दै धन्यवाद व्यक्त गरेका छन् ।
गृहमन्त्री लेखकले नारायणी अस्पतालमा उपचारविना कुनै पनि बिरामीको मृत्यु हुनु भएन । यसको लागि सरकारले अतिआवश्यक सबै शक्ति परिचालन गरेर हैजा र झाडापखाला नियन्त्रण गर्ने प्रयास गर्नेछ भन्दै आश्वासन दिए । उनले भने, “नारायणी अस्पतालका मेसुले भन्नुपर्यो यहाँ चिकित्सकको अभाव छ, भौतिक पूर्वाधार लगायत के चाहिन्छ ? स्थानीय प्रशासनले पनि भन्नुपर्यो अनि हामीले स्रोत र साधन उपलब्ध गराउंछौं ।”
छलफलमा पूर्व गृहमन्त्री एवं नेपाली कांग्रेसका नेता कृष्णप्रसाद सिटौला, कानूनमन्त्री अजय चौरसिया, खानेपानीमन्त्री प्रदीप यादव, मधेस प्रदेशका भूमि कृषि तथा सहकारीमन्त्री जनार्दन सिंह क्षत्री, वीरगंज महानगरपालिकाका प्रमुख राजेशमान सिंह, मधेशका नेपाल प्रहरीका डिआइजी उमा चतुर्वेदी, पर्साका प्रहरीक्षक गौतम मिश्र, सशस्त्र प्रहरी उपरीक्षक पुरनचन्द्र भट्टलगायतको सहभागिता थियो ।
अस्पताल विकास समितिका अध्यक्ष धीरज शर्माको अध्यक्षतामा भएको कार्यक्रमको सहजीकरण मेसु डा. चुमनलाल दासले गरेका थिए ।
