वीरगंज, १८ भदौं । पर्सा जिल्लाको जीराभवानी गाउँपालिका वडा नम्बर २ सेढवामा बुधवार आयोजित निःशुल्क आँखा जाँच शिविरमा ४९५ जनाले सेवा पाएका छन् । वीरगंज सामुदायिक आँखा केन्द्रको सहयोगमा आसमान नेपालले आयोजना गरेको शिविरमा ४९५ जनाको आँखा परीक्षण गरिएको आँखा रोग विशेषज्ञ डा. प्रभात चौरसियाले जनाएका छन् । शिविरमा १६ जना मोतियाबिन्दुका बिरामी फेला परेको तथा उनीहरूको आँखाको निःशुल्क शल्यक्रिया गरी लेन्स प्रत्यारोपण गरिने विद्यालयका प्रधानाध्यापक खेमराज चौधरीले बताए । यसैगरी बारा जिल्लाको मनकामना स्कुलमा किरण आँखा अस्पतालको सहयोगमा ७५६ जना विद्यार्थीहरूको आँखा परीक्षण गरिएको थियो । परिक्षणपछि ३६ जना विद्यार्थीमा विभिन्न सामान्य प्रकारका समस्या पाइएको नेत्र रोग विशेषज्ञ डा. अमर क्यालले जानकारी दिनुभयो ।