वीरगंज, २९ भदौ । जेनजी आन्दोलनको क्रममा भदौ २४ गते भएको लुटपाटको घटनामा लुटिएका सामग्रीहरू फिर्ता गर्न जीतपुरसिमरा उपमहानगरपालिकाले आग्रह गरेको छ । आइतवार उपमहानगरपालिकाले सूचना जारी गर्दै जेनजी आन्दोलनको क्रममा भदौ २४ गते वडा कार्यालय र स्वास्थ्य संस्थाहरूमा भएको लुटपाट र तोडफोडको घटनामा गाडी, मोटरसाइकल, साइकल, कम्प्युटर, ल्यापटप, फोटोकपी मेसिन, प्रिन्टर, स्क्यानर, सीसीटीभी, फर्निचर, महवपूर्ण कागजात तथा कर्मचारीका निजी सवारी साधनलगायतका सामग्रीहरू लुटिएको जनाएको छ । ती सामग्रीहरू कुनै पनि कारण वा माध्यमबाट कसैले देख्नु भएमा, भेटाउनु भएमा वा आफ्नो कब्जामा लिएको भए नजिकको सुरक्षा निकाय, वडा कार्यालय, वा स्वास्थ्य संस्थामा बुझाइदिन अनुरोध गरेको छ । यस कार्यमा सहयोग गर्ने व्यक्तिको पहिचान गोप्य राखिने प्रमुख प्रशासकीय अधिकृत शिवजी प्रसादले अनुरोध गरेका छन् ।