वीरगंज, २३ असोज । पर्सामा गएराति सवारी दुर्घटनामा परेर एकजनाको मृत्यु भएको छ भने एकजना घाइते भएका छन् । मृत्यु हुनेमा पर्सागढी नगरपालिका–४ हरपुरका २२ वर्षीय प्रीतम कुमार पटेल रहेका छन् ।
जीतपुरबाट बडनिहार जाने क्रममा पारस चोकभन्दा सय मिटर पूर्व उनले चलाएको मोटरसाइकल ना ६ त ५०९४ नं.को टयाक्टरमा ठोक्किएर घटनास्थलमै पटेलको मृत्यु भएको थियो भने मोटरसाइकलको पछाडि बसेका सोही गाउँका २२ वर्षीय निराजन साह कलवार गम्भीर घाइते भएका थिए ।
पटेलको शव पोष्टमार्टमको लागि नारायणी अस्पतालमा लगिएको छ भने कलवारको वीरगंज न्युरो हस्पिटल श्रीपुरमा उपचार भइरहेको परिवारजनले बताएका छन् ।
पर्सा बिरुवाचोकका सरबत दास थारुको टयाक्टर रहेको र सांझको समयमा धानको बोझा ढुवानी गर्ने क्रममा मोटरसाइकलको अगाडि रहेको टयाक्टर चालकले अचानक ब्रेक लगाउँदा पछाडिबाट आइरहेको मोटरसाइकल अनियन्त्रित भएर ठोक्किदा सो दुर्घटना भएको स्थानीय जिनेन्द्र रामले जानकारी गराएका छन् ।
पीडितलाई कानून बमोजिम किरिया खर्च र क्षतिपूर्ति उपलब्ध गराउन स्थानीय तथा मृतक तथा घाइते पक्षले जिल्ला प्रहरी कार्यालय, पर्सासंग माग गरेका छन् ।
