वीरगञ्ज ४ कात्तिक । पटेर्वा सुगौली गाउँपालिकाका पूर्व अध्यक्ष हरिनारायण चौधरीले रु छ करोड रुपैयाँ वीरगञ्जका विभिन्न क्यासिनोमा जुवा खेलेर हारेका सनसनीपूर्ण जानकारी बाहिर आएको छ। ठूलो रकम डुबाएपछि उनले अहिले बिभिन्न व्यक्तिसँग लिएको ऋण तिर्न दबाबमा परेको र शेढवास्थित आफ्नो खेत बेच्न ग्राहक खोज्दै हिँडेको गाउँलेहरुले बताएका छन् ।
वीरगञ्जमा सञ्चालित किङ्स क्यासिनो र फर्चुन सिटी गेमिङ क्लबमा नेपाली नागरिकको निर्बाध प्रवेश हुँदै आएको छ। ती क्यासिनोहरूले आज दीपावलीको अवसरमा स्वदेशी र बिदेशी जुवाडेहरूका लागि विशेष छुट र मनोरञ्जनको आकर्षक अफर दिएका छन्। यही अवसरलाई लिएर स्थानीय युवा मात्र होइन, अगुवा तहका व्यक्तिहरू समेत रातारात ऋणमा डुब्ने क्रम बढ्दै गएको छ।
लक्ष्मनवा, पिपरा र नगवाका सयौँ युवाहरू जुवाको कुलतमा फसेर घरबार गुमाउने स्थितिसम्म पुगेका छन्। पर्साका नवआगन्तुक प्रहरी उपरीक्षक सुदीपराज पाठक संग यी क्यासिनोहरूमा नेपालीको अनधिकृत प्रवेश रोक्न कडा कदम चाल्न वीरगन्जको नागरिक समाजले अपेक्षा गरेको छ।
