भारत , कार्तिक – २९
भारत नियन्त्रणमा रहेको जम्मू–कश्मीरको श्रीनगरस्थित नौगाम प्रहरी चौकीमा शुक्रबार राति जोरदार विस्फोट भएको छ। यस आक्रमणमा कम्तीमा ८ जना मारिएका र २७ जना घाइते भएका छन् ।
घटनाका बेला प्रहरी टीम र अपराध अनुसन्धान टोलीले फरिदाबादबाट जब्त गरिएको अमोनियम नाइट्रेट विस्फोटक पदार्थको नमूना परीक्षण गरिरहेका थिए। सरकारी स्रोतहरूका अनुसार यो विस्फोट आतंकवादी गतिविधि नभई “अकस्मात” भएको प्रारम्भिक निष्कर्ष छ ।
विस्फोटपछि प्रहरी चौकी परिसर, भवन र त्यहाँ खडा भएका केही गाडीहरूमा ठूलो क्षति पुगेको छ। तत्काल बचाउ टोली, दमकल र आपतकालीन जिम्मेवारीका कर्मचारी घटनास्थलमा पुगेका थिए ।
घाइतेमध्ये धेरैजसो प्रहरी र फोरेंसिक विशेषज्ञहरू रहेका छन्। केहीलाई ९२ बेस अस्पताल र शेर–ए–कश्मीर मेडिकल इन्स्टिच्युट (SKIMS) मा भर्ना गरिएको छ ।
घटनामा प्रयोग भएको विस्फोटक ठूलो भागमा ३६० किलो अमोनियम नाइट्रेट भएको बताइएको छ, जुन आतंक संग सम्बन्धित केसमा पुलिसले जफत गरेको थियो । अहिले घटनाको विस्तृत छानबिन सुरु गरिएको छ। तनावग्रस्त क्षेत्रमा सुरक्षा बढाउन अतिरिक्त व्यवस्था मिलाइएको छ।