वीरगंज , मंसिर – ६
बारामा जेन–जी युवा र एमाले कार्यकर्ताबीचको झडपपछि उत्पन्न तनावको पृष्ठभूमिमा प्रहरी उपरीक्षक (एसपी) सन्तोष तामाङलाई प्रहरी प्रधान कार्यालय (हेडक्वर्टर) तानिएको छ । तामाङको स्थानमा मानव बेचबिखन अनुसन्धान ब्यूरोमा कार्यरत एसपी नरेन्द्र कुवँरलाई बारा पठाइएको छ ।
सिमरा क्षेत्रमा दुई दिनयता जेनजी आन्दोलन र राजनीतिक समूहबीचको झडपमा प्रहरीको भूमिकाबारे प्रश्न उठ्न थालेपछि हेडक्वर्टरले तामाङलाई फिर्ता बोलाएको स्रोतहरूको अनुमान छ ।
यसै क्रममा प्रहरी संगठनभित्र अन्य सरुवाहरू पनि भएका छन्। धादिङका एसपी भेषराज रिजाललाई मधेस प्रदेश प्रहरी कार्यालय जनकपुरमा सारिएको छ भने धादिङको जिम्मेवारी एसपी सुमित खड्कालाई तोकिएको छ ।
हालैका झडप, कर्फ्यू अवज्ञा र दोहोरो तनावका घटनाले बाराको सुरक्षा स्थितिलाई चुनौती दिएका बेला नयाँ प्रहरी नेतृत्वले कस्तो रुपमा व्यवस्थापन गर्छ भन्ने कुरामा स्थानीयको ध्यान केन्द्रित भएको छ ।
