वीरगंज, ७ मंसिर । वीरगंज महानगरपालिका वडा नम्बर २८ बगहीमा रहेको प्राथमिक स्वास्थ्य केन्द्रमा आइतवारदेखि २४ घण्टे आकस्मिक स्वास्थ्य उपचार सेवा शुरू गरिएको छ ।
आइतवार वीरगंज महा नगरपालिकाका प्रमुख राजेशमान सिंहले बगही प्राथमिक स्वास्थ्य केन्द्रको २४ घण्टे आकस्मिक स्वास्थ्य उपचार सेवाको शुभारम्भ गरेका हुन् ।
मेयर सिंहले स्वास्थ्य क्षेत्रको स्तरोन्नति महानगरपालिकाको मुख्य प्राथमिकतामा रहेको र त्यसै अनुसार काम भइरहेको बताए । उनले बगही प्राथमिक स्वास्थ्य सेवा केन्द्रमा अब २४ घण्टे आकस्मिक उपचार सेवा सञ्चालनमा आएपछि बगही र त्यस आसपासका हजारौ नागरिकलाई आपतकालीन अवस्थामा उपचारका लागि अन्यत्र धाउनुपर्ने बाध्यता अन्त्य भएको बताए । कार्यक्रममा वीरगंज महा नगरपालिकाका प्रमुख प्रशासकीय अधिकृत अरबिन्दलाल कर्ण, वडाध्यक्ष सर्युग महतो धानुक लगायतकाको सहभागिता थियो ।
