राधेश्याम पटेल
वीरगंज, १० मंसिर । केही समयदेखि छिमेकी भारतको रक्सौलबाट ई–मोटरसाइकल निर्बाध वीरगंज प्रवेश गरिरहेका छन् ।
नम्बर प्लेट नभएका अनटेस्ट ई–मोटरसाइकलहरू वीरगंज भन्सार कार्यालयबाट वीरगंज शहर प्रवेश अनुमतिपत्रविना सीधा प्रवेश पाउँदै आएका छन् ।
जबकि भारतीय सवारीसाधनका हकमा वीरगंज शहरसम्मका लागि दुई चक्के, चार चक्केले दैनिक प्रवेश अनुमतिपत्र लिनुपर्छ र सोही दिन रक्सौल फिर्ता जानुपर्छ ।
यो नियम नम्बर प्लेट भएकाहरूको हकमा मात्र हो । अनटेस्ट भारतीय सवारीसाधनहरूलाई नेपाल प्रवेश रोक रहेको वीरगंज भन्सार कार्यालयले जनाएको छ ।
शहर प्रवेशका लागि भन्सारबाट दैनिक र रात बिताउनेहरूको हकमा भन्सार विभागले तोके अनुसारको शुल्क तिरेर तोके अनुसारको दिन बिताउन पाउने प्रमुख भन्सार प्रशासक विष्णुप्रसाद ज्ञवाली बताउँछन् ।
नम्बर प्लेटविना कुनै पनि भारतीय सवारीसाधन नेपाल प्रवेश हुनुनपर्ने र भएको छ भने आजकै मितिबाट रोकिने उनले बताए ।
रक्सौलमा सस्तो मूल्यमा पाइने ई–मोटरसाइकल अहिले वीरगंजमा छ्यापछ्याप्ती देखिन थालिएका छन् ।
वीरगंजमा ई–मोटरसाइकल नम्बर प्लेट राखेर सञ्चालन गर्नुपर्छ । यसबारेमा ट्राफिक प्रहरीले पनि ध्यान दिएको पाइएको छैन ।
भन्सार बिन्दुअगाडि नेपाल प्रहरी र सशस्त्र प्रहरीले चेकजाँच गर्छन् ।
त्यहींबाट यस प्रकारका गैरकानूनी गतिविधि रोकिनुपर्ने हो । तर सामानमा मात्र ध्यान दिंदै आएका कारण सुरक्षाकर्मीहरूले यसलाई रोक्न आफ्नो जिम्मेवारी सम्झेका छैनन् ।
