वीरगंज , मंसिर – १७
बारामा पानी उद्योगका म्यानेजरको हत्या प्रकरणमा संलग्न दुई जना पक्राउ परेका छन् । पक्राउ पर्नेमा वीरगंज महानगरपालिका –२२ मनियारीका २१ वर्षीय राजन कुमार राम र उनका साथी ३२ वर्षीय प्रमोदसाह तुरहा रहेका छन् । राजन उद्योगमा चालकका रूपमा काम गर्दै आएका व्यक्ति हुन् ।
बाराको प्रसौनी गाउँपालिका–६ भलुही चोकस्थित किरण बेभरेज नेपाल प्रालिका म्यानेजर रामकिशोर सिंहको गत बिहीबार राति धारिलो हतियार र इँटाले प्रहार गरी हत्या गरिएको थियो । उनको शव भोलिपल्ट बिहान उद्योग नजिकै भेटिएको थियो ।
बारा प्रहरीका अनुसार पुरानो विवाद र कामबाट हटाइएकै रिसइबीका कारण दुबै जनाले मिलेर हत्या गरेका हुन् । राजनले गत वर्ष देखिनै म्यानेजरसँग मनमुटाव भइरहेका बेला कात्तिक १० गते उनलाई कामबाट हटाइएको थियो । यही रिसले मंसिर ११ गते साँझ दुवैले रक्सी सेवनपछि फ्याक्ट्री पुगेर छुरा र इँटाले आक्रमण गरेको प्रहरीले जनाएको छ ।
हत्या गरेपछि उनीहरूले शव फ्याक्ट्री नजिकैको खाल्डोमा फालेका थिए । राजन भारत भाग्ने क्रममा छिपहरमाई–५ बाट पक्राउ परेका हुन् भने प्रमोद साहलाई वीरगंजमै लुकिरहेको अवस्थामा पक्राउ गरिएको हो । प्रहरीले उनीहरूको साथबाट रगत लागेको छुरा र इँटा बरामद गरेको छ । दुवै जनाविरुद्ध कर्तव्य ज्यान मुद्दा दर्ता गरेर बारा जिल्ला अदालतबाट सात दिनको म्याद थपिएको छ ।
घटनापछि प्रहरीले छिटो अनुसन्धान अघि बढाएको थियो र १६ घण्टा नबित्दै दुई जना पक्राउ परेका हुन् ।
