वीरगंज, १४ मंसिर । २९ किलो लागू औषध गाँजासहित एकजना भारतीय नागरिक पर्साबाट पक्राउ परेका छन् ।
नेपालबाट भारत गाँजा तस्करी गर्ने क्रममा भारतको बिहार राज्यको बेतिया जिल्लाको मुशहरी गाउँका ६५ वर्षीय गामा बिनलाई प्रहरीले २९ केजी गाँजासहित पक्राउ गरेको जनाएको छ । पर्सा जिल्लाको जीराभवानी गाउँपालिका वडा नम्बर. ५ शंकरसरैया स्थित बाँसवारीमा लागु औषध ओसार पसारको काम भइरहेको सूचनाको आधारमा इलाका प्रहरी कार्यालय पटेर्वासुगौलीबाट प्रहरी निरीक्षक प्रकाश थापाको नेतृत्वमा खटिएको प्रहरीको टोलीले बिनलाई २९ केजी गाँजासहित पक्राउ गरेको जिल्ला प्रहरी कार्यालय पर्साका प्रहरी नायब उपरीक्षक राजु कार्कीले जानकारी गराएका छन् ।
बिनलाई जिल्ला प्रहरी कार्यालय पर्साको हिरासतमा राखेर लागु औषध सम्बन्धी कसूरमा थप अनुसन्धान कार्य भइरहेको प्रहरीले जनाएको छ ।
Facebook Comments Box
