वीरगंज , मंसिर — १४
वीरगंज–२४, रामगढवामा एकता युवा क्लबले सवारी दुर्घटना रोकथाम तथा न्यूनीकरणबारे जागरण कार्यक्रम सम्पन्न गरेको छ। क्लबको आयोजनामा र जिल्ला ट्राफिक कार्यालय पर्साको प्राविधिक सहकार्यमा भएको कार्यक्रममा सडक सुरक्षा, सुरक्षित ड्राइभिङ, ट्राफिक नियम पालनासहित दुर्घटना घटाउने उपायहरूबारे प्रशिक्षण प्रदान गरिएको थियो।
वक्ताहरूले पछिल्लो समय दुर्घटना बढ्नुमा तीव्र गति, नियम उल्लङ्घन, हेल्मेट–सीटबेल्ट प्रयोग नगर्ने जस्ता प्रवृत्ति मुख्य कारण रहेको बताउँदै प्राथमिक उपचारदेखि समुदायस्तरमा सचेतना फैलाउने तरिकासम्मका व्यावहारिक विषयहरूमा जानकारी दिएका थिए।
जिल्ला ट्राफिक कार्यालय पर्साका प्रहरी उपरीक्षक युवराज कटवालको प्रमुख उपस्थितिमा सम्पन्न कार्यक्रमले स्थानीय बासिन्दा, युवासमुदाय र सवारी चालकलाई सडक सुरक्षाप्रति जिम्मेवार बन्न प्रेरित गरेको सहभागीहरूको भनाइ छ।
एकता युवा क्लबका कोषाध्यक्ष शिवराज पटेलले यस्ता कार्यक्रमलाई निरन्तरता दिन क्लब प्रतिबद्ध रहेको बताए ।
