वीरगंज १० माघ । प्याब्सन नेपाल मेडिसिटी अन्तर विद्यालय टी–२० नकआउट क्रिकेट प्रतियोगिता २०८२ अन्तर्गत दोस्रो दिन शनिवार तीन खेल सम्पन्न भएका छन्।
पहिलो खेल लिटल एन्जल्स मावि र ज्ञानदा एकेडेमीबीच भएको थियो । टस जितेर पहिले ब्याटिङ गरेको लिटल एन्जल्स माविले १५ ओभरमा ८ विकेट गुमाउँदै ८८ रन बनाएको थियो । जवाफी ब्याटिङमा उत्रिएको ज्ञानदा एकेडेमीले ११.४ ओभरमै ६ विकेटको क्षतिमा लक्ष्य पूरा गर्दै ४ विकेटले विजय हासिल गर्यो । खेलको म्यान अफ द म्याच ज्ञानदा एकेडेमीका आदित्य महतो घोषित भए।
दोस्रो खेल माउण्ट मकालु र मालिनी एकेडेमीबीच सम्पन्न भयो। टस जितेर बलिङ रोजेको मालिनी एकेडेमीले माउण्ट मकालुलाई १२.१ ओभरमा सबै विकेट गुमाउँदै ७२ रनमै समेट्यो। तर जवाफी ब्याटिङमा मालिनी एकेडेमीले पुरै ओभर खेले पनि ६६ रन मात्र बनाउन सक्दा माउण्ट मकालुसँग पराजित भयो। यस खेलका म्यान अफ द म्याच माउण्ट मकालुका आकाश कुमार महतो बने।
तेस्रो खेल वीरगंज स्कूल र श्री आदर्श माविबीच भएको थियो। टस जितेर ब्याटिङ रोजेको वीरगंज स्कूलले निर्धारित ओभरमा ३ विकेटको क्षतिमा १११ रनको बलियो योगफल तयार गर्रुयो। जवाफमा ब्याटिङ गरेको श्री आदर्श मावि सबै विकेट गुमाउँदै ६५ रनमै सीमित भएपछि वीरगंज स्कूल सहज जित निकाल्न सफल भयो। खेलको म्यान अफ द म्याच वीरगंज स्कूलका अनिस कुमार पटेल घोषित भए।
यसैबीच प्याब्सन पर्साको आयोजनामा जुनियर नकआउट फुटबल प्रतियोगिता पनि शुरू भएको छ। प्रतियोगितामा २१ वटा विद्यालय सहभागी छन । ४ फिट १० इन्च उचाइ समूहका खेलाडीहरूबीच सञ्चालन हुने प्रतियोगिता जिल्ला प्रहरी कार्यालय पर्साको पछाडिको खेल मैदानमा भइरहेको छ।
उदघाटन खेल एसआर ग्यालेक्सी मावि र ज्ञान ज्योति माविबीच सम्पन्न भयो। २५–२५ मिनेटको दुर्ई हाफमध्ये दोस्रो हाफमा एसआर ग्यालेक्सीका आलोक गिरीले निर्णायक गोल गर्दै टिमलाई जित दिलाए। उनै खेलको म्यान अफ द म्याच घोषित भए।
प्रतियोगिताको उदघाटन मधेश प्रदेश खेलकुद परिषद्का सदस्य सचिव शिवजी गुप्ताले गरेका हुन। प्याब्सन पर्साका अध्यक्ष सरोज प्रसाद चौधरीको अध्यक्षतामा सम्पन्न उदघाटन समारोहमा मुख्य प्रायोजक राज होजियारीका प्रोप्राइटर राज साह, जिल्ला प्रहरी कार्यालय पर्साका डीएसपी राजु काकी, प्याब्सन केन्द्रीय सदस्य छेदुप लामा, प्याब्सन मधेश प्रदेशका उपाध्यक्ष इमामुदिन अहमद, प्राज्ञिक सल्लाहकार लालबाबु पटेल, प्रेस सेन्टर मधेश प्रदेश अध्यक्ष निरज पिठाकोटे मगर, समाजवादी प्रेस संगठन मधेश प्रदेश अध्यक्ष मनोज पटेल, जिल्ला अध्यक्ष शम्भु कुमार सुमन लगायतको उल्लेखनीय उपस्थिति रहेको थियो।
