वीरगंज , ६ फागुन –
सिन्धुलीको दुधौली नगरपालिकाका नगरप्रमुख दिनेश अधिकारी दनुवारलाई होटलमा काम गर्ने एक किशोरीमाथि जबरजस्ती करणी गरेको आरोपमा प्रहरीले पक्राउ गरी अनुसन्धान अघि बढाएको छ।
जिल्ला प्रहरी कार्यालय सिन्धुलीका अनुसार पीडित किशोरीले दिएको जाहेरीका आधारमा नगरप्रमुख दनुवारलाई नियन्त्रणमा लिइएको हो। जाहेरीमा उल्लेख भएअनुसार किशोरी दुधौली क्षेत्रमा रहेको एक होटलमा कार्यरत रहँदा उक्त घटना भएको बताइएको छ। पीडित त्यतिबेला नाबालिग रहेको र घटनापछि गर्भवती भई सन्तान जन्माएको विवरण पनि जाहेरीमा उल्लेख छ।
प्रहरीका अनुसार उजुरी दर्ता भएको लामो समयपछि अनुसन्धानको दायरामा आएका नगरप्रमुख दनुवार हाल प्रहरी हिरासतमा छन् र घटनासम्बन्धी थप अनुसन्धान भइरहेको छ। कानुनी प्रक्रिया अनुसार अनुसन्धान सकेर आवश्यक कारबाही अघि बढाइने प्रहरीको भनाइ छ।
यस घटनाले स्थानीय तहमा गम्भीर चासो र बहस सिर्जना गरेको छ भने पीडितलाई न्याय दिलाउन निष्पक्ष अनुसन्धानको माग उठ्न थालेको छ।
