वीरगंज, चैत १० –
वीरगंजस्थित श्रीसिया क्षेत्रमा कोइला ह्यान्डलिङको नयाँ व्यवस्थाले स्थानीय बासिन्दालाई स्वास्थ्य समस्या सिर्जना गरेको छ। पहिले रेलमार्फत भन्सार क्षेत्रमा व्यवस्थापन हुने कोइला अहिले सिधै बस्तीमा अनलोड भइरहेका कारण वरपर कालो धूलो फैलिन थालेको छ।
स्थानीय बासिन्दा भन्छन्, “दैनिकरूपमा घर, सडक र वरिपरि धूलो जम्छ, सास फेर्न पनि गाह्रो भएको छ।” चिकित्सकहरूका अनुसार कोइला धूलोमा रहेका सूक्ष्म कणले दीर्घकालीन श्वासप्रश्वास रोग, फोक्सो क्षति र बालबालिका तथा वृद्धवृद्धामा स्वास्थ्य जोखिम बढाउँछ।
वातावरणीय विज्ञहरूले कोइला अनलोड बस्तीबाट टाढा राख्न र धूलो नियन्त्रणका उपाय अपनाउन सुझाएका छन्। कोइला अनलोड हुने क्षेत्रमा मकै, चामल, चिनी, नून लगायतका खाद्य सामग्री र मल भण्डारण भएकाले खाद्य सुरक्षा र जनस्वास्थ्यमा जोखिम बढ्ने चेतावनी दिइएको छ।
स्थानीयहरूले अदालतमा मुद्दा दायर गरी कोइला अनलोड रोकिनुपर्ने माग गरेका छन्। अहिलेसम्म आदेश नभएकोले काम निरन्तर जारी छ।
