स्थानीय ६५ वर्षीय अद्देलाल रायले आफ्नो खाली खेतमा लगाएको आगो छिमेकीका उखु बारीमा सल्किएपछि आगलागी भएको हो। आगलागीबाट उखुबाली जलेर नष्ट भएको छ ।
मंगलबार दिउँसो १ः०० बजे सुरु भएको आगो आधा घण्टाभित्रै अन्य किसानका खेतमा पुगेको थियो। घटनाको जानकारी पाउनासाथ प्रहरी चौकी खैर्वा बहुअर्वाबाट प्रहरी सहायक निरीक्षक शम्भु प्रसाद यादवको नेतृत्वमा टोली परिचालन गरिएको थियो। प्रहरी र स्थानीय बासिन्दाको सामूहिक प्रयासमा दिउँसो ४ः३० बजे आगो पूर्ण रूपमा नियन्त्रणमा आएको छ।
आगलागीबाट मानवीय र चौपायाको क्षति नभए पनि १२ जना किसानको ७४.५ कठ्ठामा लगाएको उखु पूर्ण रूपमा नष्ट भएको छ। सबैभन्दा बढी क्षति राम किशोर गिरीको २० कठ्ठा, राजकुमार सहनीको १० कठ्ठा र रघुनाथ सहनीको १० कठ्ठा उखु बारीमा पुगेको छ।
यसैगरी रामबाबु गिरी, संजय सहनी, राम बिनोद गिरी, बैजनाथ राय, जगतनाथ राय, प्रसाद राय, नरेश राय, जय सागर यादव र राम जोघी रायको खेतमा लगाइएको उखु पनि जलेर खरानी भएको छ।
प्रहरी चौकीबाट करिब ३ किलोमिटर पूर्वमा रहेको सो घटनास्थलमा पुगेको प्रहरी टोलीले क्षतिको विस्तृत विवरण संकलन गरिरहेको छ। खेतमा आगो लगाउँदा सावधानी नअपनाउँदा छिमेकी किसानहरूले ठुलो आर्थिक नोक्सानी व्यहोर्नुपरेको छ।
