वीरगञ्ज, २१ चैत्र –
वैदेशिक रोजगारमा जाने श्रमिकबाट अब सेवा शुल्क अधिकतम १० हजार रुपैयाँमात्र लिने नीति कडाइका साथ लागू भएको छ। श्रम, रोजगार तथा सामाजिक सुरक्षा मन्त्रालयले यसअघि तोकिएको भन्दा बढी शुल्क लिने संस्थामाथि कडा कारबाही गरिने जनाएको छ।
श्रम, रोजगार तथा सामाजिक सुरक्षामन्त्री दीपककुमार साहले जारी भिडियो सन्देशमा भने, “इजाजतप्राप्त म्यानपावर कम्पनीहरूले मात्र १० हजार रुपैयाँ सेवा शुल्क लिएर श्रमिक पठाउन सक्छन्। यदि कसैले यसभन्दा बढी शुल्क लिन्छ भने तुरुन्त उजुरी गर्न आग्रह छ।”
मन्त्रालयले हेलो सरकार (११११) र श्रमधान कल सेन्टर (११४१) मार्फत उजुरी प्रणाली चलाएको छ। त्रिभुवन विमानस्थलमा पनि श्रमिकलाई तोकिएको शुल्कबारे सोधपुछ गरिनेछ। वैदेशिक रोजगार विभागले बढी शुल्क लिने म्यानपावर कम्पनीहरूसँग विवरण बुझाउन पत्राचार सुरु गरेको छ।
स्रोतका अनुसार, केही संस्थाले कानुन नमान्दै मलेसियामा श्रमिक पठाएको गुनासो प्राप्त भएपछि विभागले पठाइएको श्रमिकको विवरण, शुल्क भुक्तानी प्रमाणसहित तुरुन्त पेश गर्न अनुरोध गरेको छ।
यो नीति २०७२ जेठ २६ गते तत्कालीन राज्यमन्त्री टेकबहादुर गुरुङको पालामा लागू गरिएको हो। उक्त समयमा साउदी अरब, कतार, कुवेत, बहराइन, ओमान, युएई र मलेसियामा जाने श्रमिकहरूबाट मात्रै १० हजार रुपैयाँ सेवा शुल्क लिन सकिने व्यवस्था गरिएको थियो।
