सशस्त्र प्रहरी बल नेपाल बोर्डर आउट पोष्ट (बिओपी) बेलबिछवाबाट खटिएको सीमा गस्ती टोलीले रौतहटको राजदेवी नगरपालिका–८ बाट स्रोत नखुलेको रकमसहित भारतको विहार राज्य सितामढीका नजिर नटको साथबाट रु तीन लाख २२ हजार र सर्लाही जिल्ला स्थायी घर भएका मुम्ताज अन्सारीको साथबाट रू दुई लाख ४९० सहित पक्राउ गरेको हो ।
सशस्त्र प्रहरी बल नेपाल सीमा सुरक्षा गुल्म गौरका गुल्मपती एवं सशस्त्र प्रहरी नायब उपरीक्षक प्रेमसागर विष्टले दुवै जानको साथबाट बरामद गरिएको रकम गौर भन्सार कार्यालयमा बुझाएर आवश्यक अनुसन्धान जारी रहेको जानकारी दिनुभयो ।
सशस्त्र प्रहरीले निजहरू सवार रहेको विआर ०६ए ६२९२ नम्बरको भारतीय मोटरसाइकलसमेत बरामद गरेको छ । सशस्त्र प्रहरी बल नेपाल नम्बर ११ गण हेडक्वाटरका गणपति रामहरि अधिकारीले सशस्त्र प्रहरीले पछिल्ला दिनमा सीमा क्षेत्रमा सक्रियता बढाएसँगै अवैध सरसमान बरामद हुने क्रम बढेको बताउनुभयो ।
सशस्त्र प्रहरीले आजै रौतहटका विभिन्न स्थानबाट अवैध भारतीय ब्रोइलर कुखुरा नियन्त्रणमा लिएर नष्ट गरेको जनाएको छ । सशस्त्र प्रहरीले जिल्लाको परोहा नगरपालिकामा नरकटिया सीमा इलाकामा सानो सीमा स्तम्भ नं ३५५÷२ अन्तर्गत भारतबाट नेपालतर्फ ल्याउँदै गरेको अवैध भारतीय ब्रोइलर कुखुरा ५४ थान नियन्त्रणमा लिई स्थानीय जनप्रतिनिधिको रोहवरमा नष्ट गरेको जनाएको छ ।
रासस
