वीरगंज, जेठ २४ –
वीरगंज मुख्य सडक विस्तार परियोजनाअन्तर्गत १२०० भन्दा बढी घर, पसल तथा अन्य संरचना हटाइएपछि हजारौँ नागरिक प्रभावित भए पनि परियोजनाको वर्तमान अवस्था र प्रगतिबारे स्पष्ट जानकारी नआएको भन्दै स्थानीय स्तरमा प्रश्न उठ्न थालेका छन्।
सडक विस्तारका क्रममा वर्षौँदेखि सञ्चालनमा रहेका व्यवसाय तथा आवासीय संरचना हटाइएपछि प्रभावित परिवार ठूलो आर्थिक र सामाजिक संकटमा परेको स्थानीयवासीको गुनासो छ। तर निर्माण कार्य हाल कहाँसम्म पुगेको हो भन्ने विषयमा सम्बन्धित निकायले स्पष्ट जानकारी सार्वजनिक नगरेको आरोप लगाइएको छ।
सामाजिक अभियन्ता शरण गुप्ताले परियोजनाको वास्तविक प्रगति, खर्च र समयसीमा सार्वजनिक गर्न माग गरेका छन्। उनका अनुसार ठूलो मात्रामा संरचना हटाइसकिए पनि काम सुस्त वा रोकिएको अवस्था देखिनु चिन्ताजनक छ।
गुप्ताले विकास परियोजना पारदर्शी, उत्तरदायी र जनमुखी हुनुपर्ने भन्दै प्रभावित नागरिकलाई राहत, पुनर्स्थापना र प्रगति विवरणबारे नियमित जानकारी दिनुपर्ने आवश्यकता औँल्याएका छन्।
सरोकारवालाले परियोजनाको कानुनी आधार, हटाइएका संरचनाको विवरण, प्रभावित नागरिकको संख्या, खर्च भएको रकम तथा बाँकी कामको समयसीमा सार्वजनिक गर्नुपर्ने माग गरेका छन्। साथै भविष्यमा यस्ता परियोजनामा नागरिकको सूचना, परामर्श र पुनर्स्थापनाको अधिकार सुनिश्चित गर्न आवश्यक व्यवस्था गर्नुपर्ने उनीहरूको भनाइ छ।
स्थानीयवासीले ठूलो क्षति व्यहोरेपछि पनि विकास परियोजनाको स्पष्ट दिशानिर्देश नहुँदा अन्योल बढेको बताएका छन्।
