पर्सा, साउन २२ —
मलयालम चलचित्र ‘अञ्जाम पथिरा’ एक रहस्यमय क्राइम थ्रिलर फिल्म हो, जसले सुरुदेखि अन्त्यसम्म दर्शकलाई रोमाञ्चक यात्रामा राख्छ। फिल्मको कथा भारतको कोच्ची सिटीमा प्रहरी अधिकारीहरूको श्रृंखलाबद्ध हत्याबाट सुरु हुन्छ।
डिवाइएसपी अब्राहम कोशी बेपत्ता भएपछि उनको शव अत्यन्तै विभत्स अवस्थामा फेला पर्छ। त्यसपछि अर्को प्रहरी अधिकारी पनि रहस्यमय ढंगले मारिन्छन्। घटनास्थलमा भेटिएका समान प्रमाण, पोस्टमर्टम रिपोर्ट र लेडी जस्टिसको मूर्तिले अनुसन्धानलाई थप जटिल बनाउँछ।
घटनाको अनुसन्धान डिसीपी क्याथरिनको नेतृत्वमा अघि बढ्छ भने मनोवैज्ञानिक तथा अपराधशास्त्री अन्वर हुसेनले हत्याराको मनोविज्ञान विश्लेषण गर्दै अनुसन्धानमा महत्त्वपूर्ण भूमिका निर्वाह गर्छन्। सिसिटिभी फुटेजमा गरिएको छेडखानी र प्रविधिको प्रयोगले हत्यारा प्रहरीको सुरक्षा प्रणालीबारे राम्रो जानकारी भएको संकेत गर्छ।
प्रहरीले विभिन्न रणनीति अपनाए पनि हत्यारा सधैं एक कदम अगाडि देखिन्छ। घटनाक्रम थप रहस्यमय बन्दै जाँदा अनुसन्धानले नयाँ मोड लिन्छ र अन्त्यसम्म हत्याराको खोजी रोमाञ्चक ढंगले अघि बढ्छ।
सन् २०२० मा प्रदर्शन भएको ‘अञ्जाम पथिरा’ वर्षकै सर्वाधिक कमाइ गर्ने मलयालम फिल्ममध्ये एक बनेको थियो। यो फिल्म हिन्दी भाषामा ‘पुलिस स्टोरी’ नामबाट पनि उपलब्ध छ।
