वीरगंज । वीरगंजस्थित बाल सुधार गृहबाट लागुऔषध कसुरमा सजाय भोगिरहेका १७ वर्षीय युवक फरार भएका छन्। युवक चार दिनदेखि फरार रहेको तथ्य सार्वजनिक भएको हो।
पर्सा प्रहरीले बाल सुधार गृहको झ्यालबाट हाम फालेर युवक फरार भएको पुष्टि गरेको छ। पर्सा प्रहरीका प्रवक्ता डीएसपी चक्र मल्लका अनुसार मंगलबार बिहान करिब साढे ५ बजेतिर १७ वर्षीय ‘क’ नाम गरेका युवक सुधार गृहबाट फरार भएका हुन्।
प्रहरीका अनुसार बिहानको समयमा बाल सुधार गृहको पछाडिपट्टिको झ्यालबाट उनी बाहिरिएका थिए। लागुऔषधसम्बन्धी कसुरमा अदालतको फैसलापछि उनलाई बाल सुधार गृहमा राखिएको प्रहरीले जानकारी दिएको छ।
अदालतको फैसलापछि करिब एक साताअघि मात्रै उनलाई सुधार गृहमा ल्याइएको थियो। सर्लाहीको गोडैता नगरपालिका घर भएका ती युवक फरार भएलगत्तै प्रहरीले खोजी सुरु गरे पनि हालसम्म फेला पार्न नसकेको डीएसपी मल्लले जानकारी दिएका छन्।
फरार युवकको खोजीका लागि सम्भावित स्थानमा निगरानी बढाउनुका साथै आवश्यक अनुसन्धान भइरहेको प्रहरीले जनाएको छ।
