वीरगंज , भदौ –
रसुवाको भोटेकोशीमा आएको विनाशकारी बाढीपछि बेपत्ता भएका व्यक्तिहरूमध्ये हालसम्म ७५२ जनाको शव फेला परेको छ। ठूलो जनधनको क्षति भएको बाढीमा अझै २ हजार ५०२ जना सम्पर्कविहीन छन्।
राष्ट्रिय विपद् जोखिम न्यूनीकरण तथा व्यवस्थापन प्राधिकरणले आइतबार दिउँसो १ बजे सार्वजनिक गरेको विवरणअनुसार बाढी प्रभावित विभिन्न जिल्लाबाट बेपत्ता भएकामध्ये ७५२ जनाको शव फेला परेको हो।
प्राधिकरणका अनुसार सबैभन्दा धेरै शव चितवनमा फेला परेका छन्। चितवनमा मात्रै २५९ जनाको शव भेटिएको छ। त्यस्तै, नवलपरासी पूर्वमा १८४, नवलपरासी पश्चिममा १००, गोरखामा ५८, नुवाकोटमा ५२, धादिङमा ५०, तनहुँमा ३६ र रसुवामा १३ जनाको शव फेला परेको छ।
बाढीपछि प्रभावित क्षेत्रमा उद्धार कार्यलाई निरन्तरता दिइएको छ। हालसम्म ८ हजार ७३० जनाको उद्धार गरिएको प्राधिकरणले जनाएको छ।
तर, विपद्को प्रभाव अझै समाप्त भएको छैन। प्राधिकरणको पछिल्लो विवरणअनुसार २ हजार ५०२ जना अझै सम्पर्कविहीन छन्। उनीहरूको खोजी तथा उद्धारका लागि सम्बन्धित निकायले काम गरिरहेका छन्।
भोटेकोशी बाढीले रसुवासहित आसपासका जिल्लामा ठूलो क्षति पुर्याएपछि प्रभावित क्षेत्रमा खोजी, उद्धार तथा राहतका गतिविधि जारी छन्।
