बारा , भदौ २६ –
तीन वर्षीया बालिकाको बलात्कारपछि हत्या भएको घटनामा प्रतिवादी बनाइएका जीतपुरसिमरा उपमहानगरपालिका–१ का प्रोग्रेश (पुरग्रेश) चौधरीसहित १० जना रिहा भएका छन् ।
बारा जिल्ला अदालतका न्यायाधीश प्रकाशकुमार अधिकारीको इजलासले प्रोग्रेशलाई २० हजार रुपैयाँ धरौटीमा र अन्य नौ जनालाई साधारण तारेखमा रिहा गर्ने आदेश दिएको हो । अदालतले घटनामा उनीहरूको संलग्नता पुष्टि हुने पर्याप्त प्रमाण नदेखिएको जनाएको छ ।
रिहा हुनेमा प्रोग्रेशका बुबा इन्द्रजीत, आमा बबिता, पत्नी पुष्पा, दिदी ममता, सविता चौधरी, बिन्दु चौधरी, टेकबहादुर थापामगर, नवीन विक र शेष हस्मुदिन छन् । बालिकाका बुबा मनोज चौधरीको किटानी जाहेरीका आधारमा प्रहरीले उनीहरूमाथि अपहरण, शरीर बन्धक, जबर्जस्ती करणी र कर्तव्य ज्यान मुद्दा दर्ता गरेको थियो ।
यसअघि अदालतले घटनामा प्रतिवादी बनाइएका दुई नाबालकलाई मुद्दाको पुर्पक्षका लागि बाल सुधारगृह पठाउने आदेश दिएको थियो । तीमध्ये एक नाबालकले घटनामा आफ्नो संलग्नता स्वीकार गरेको प्रहरीको दाबी छ भने अर्का नाबालकले संलग्नता अस्वीकार गरेका छन् ।
अनुसन्धानका क्रममा नाबालकले चिकित्सकसँग कुरा गरिरहेको भिडियो बाहिरिएपछि प्रहरीले भिडियो सार्वजनिक गर्ने प्रहरी हवल्दार कुमार विकविरुद्ध वैयक्तिक गोपनीयतासम्बन्धी ऐन र विद्युतीय कारोबार ऐनअन्तर्गत कारबाही अघि बढाएको छ ।
जीतपुरसिमरा–१ की तीन वर्षीया बालिकाको शव भदौ २ गते घरबाट करिब एक सय मिटर दक्षिणतर्फको खाली घरमा फेला परेको थियो ।
साउन ३१ गतेदेखि हराएकी बालिकाको बलात्कारपछि हत्या भएको भन्दै घटनाविरुद्ध देशभर प्रदर्शन भएको थियो । भदौ ६ गते सरकार र पीडित परिवारबीच तीनबुँदे सहमति भएपछि भदौ ७ गते बालिकाको कलैयास्थित पसाहा खोलामा अन्त्येष्टि गरिएको थियो ।
