वीरगञ्ज। श्रीसिया नदीको बढ्दो दुर्गन्ध र प्रदूषणको समस्यालाई लिएर मधेस जागरण अभियानका केन्द्रीय संयोजक कृष्ण मोहन सहनीले वीरगञ्ज उद्योग वाणिज्य संघको भूमिका र जिम्मेवारीमाथि प्रश्न उठाएका छन्। उनले वर्षौंदेखि श्रीसिया नदीको समस्या समाधानका लागि आश्वासन दिइए पनि आम नागरिकले दुर्गन्ध र प्रदूषणको सास्ती भोग्नुपरेको भन्दै सम्बन्धित सरोकारवालाहरू गम्भीर बन्नुपर्ने बताएका छन्।
सहनीले वीरगञ्ज उद्योग वाणिज्य संघ व्यापारीहरूको हित संरक्षणमा मात्र सीमित नभई आम नागरिकको स्वास्थ्य, वातावरण र जनजीवनसँग जोडिएका समस्यामा पनि जिम्मेवार बन्नुपर्ने धारणा राखेका छन्। उनका अनुसार श्रीसिया नदीको दुर्गन्धले स्थानीय बासिन्दाको दैनिक जीवन प्रभावित भइरहँदा समस्या समाधानका लागि प्रभावकारी पहल हुन आवश्यक छ।
“वीरगञ्ज उद्योग वाणिज्य संघ केवल व्यापारीहरूको हितका लागि मात्र हो कि आम जनताको दुःख–पीडामा साथ दिनका लागि पनि हो?” भन्ने प्रश्न उठाउँदै सहनीले संघले श्रीसिया नदीको समस्यालाई प्राथमिकतामा राखेर सम्बन्धित निकायमाथि दबाब सिर्जना गर्नुपर्ने बताएका छन्।
उनले प्रत्येक वर्ष आश्वासन दिने तर समस्याको स्थायी समाधानतर्फ पर्याप्त प्रगति नदेखिनु चिन्ताजनक भएको उल्लेख गर्दै अब नागरिकलाई आश्वासनभन्दा पनि ठोस परिणाम आवश्यक रहेको बताएका छन्।
सहनीले श्रीसिया नदीको प्रदूषणका स्रोत पहिचान, जिम्मेवार पक्षको जवाफदेहिता सुनिश्चितता तथा नदी सफाइका लागि समयसीमासहितको कार्ययोजना बनाउन माग गरेका छन्। साथै, वीरगञ्ज उद्योग वाणिज्य संघका अध्यक्षसहित सम्बन्धित निकायले यस विषयमा आफ्नो धारणा सार्वजनिक गर्दै समाधानका लागि तत्काल पहल गर्नुपर्ने उनको भनाइ छ।
उनले श्रीसिया नदीको समस्या कुनै एक संस्था वा व्यक्तिको मात्र विषय नभई सम्पूर्ण वीरगञ्जवासीको स्वास्थ्य र वातावरणसँग जोडिएको सार्वजनिक सरोकारको विषय भएको बताए। यस समस्यालाई बेवास्ता गरिए नागरिकस्तरबाट शान्तिपूर्ण तथा लोकतान्त्रिक रूपमा दबाब सिर्जना गरिने पनि उनले बताएका छन्।
“डरले होइन, आँटले आवाज उठाऔँ। श्रीसिया नदीको दुर्गन्धबाट जनतालाई राहत दिलाउन सबै सरोकारवाला जिम्मेवार बन्नुपर्छ। अब आश्वासन होइन, काम र परिणाम चाहिन्छ,” सहनीले जोड दिएका छन्।
श्रीसिया नदीको प्रदूषण नियन्त्रण, नियमित सरसफाइ र दीर्घकालीन व्यवस्थापनका लागि सम्बन्धित सरकारी निकाय, उद्योगी, व्यवसायी तथा स्थानीय समुदायबीच समन्वय आवश्यक देखिन्छ।
यस विषयमा वीरगञ्ज उद्योग वाणिज्य संघको आधिकारिक प्रतिक्रिया तथा श्रीसिया नदीको प्रदूषण नियन्त्रणका लागि हालसम्म भएका प्रयासबारे थप जानकारी प्राप्त हुन सकेको छैन। संघको प्रतिक्रिया प्राप्त भएपछि समाचारमा समावेश गर्न सकिनेछ।
