वीरगंज, २ भदौं । वीरगंज उद्योग वाणिज्य संघले सशस्त्र प्रहरी उपरीक्षक स्व. सुमन थपलियाको स्मृतिमा स्थापना गरेको उत्कृष्ट इमान्दारिता पुरस्कार (बेस्ट इन्टेग्रेटी) सशस्त्र प्रहरी नायब उपरीक्षक लोकेन्द्र सुब्बालाई प्रदान गरेको छ । सोमवार वीरगंज उद्योग वाणिज्य संघको सभाकक्षमा आयोजित कार्यक्रममा उक्त पुरस्कार सुब्बालाई प्रदान गरिएको हो । कार्यक्रममा संघका अध्यक्ष हरि गौतम तथा सशस्त्र प्रहरी महानिरीक्षक कृष्णप्रसाद ढकालले संयुक्त रूपमा २५ हजार रुपियाँँ राशीको उक्त पुस्कार सुब्बालाई प्रदान गरेका थिए । सुब्बा वीरगंज भन्सार कार्यालय परिसरमा स्थापित सशस्त्र प्रहरीको प्रस्तावित गुल्ममा कार्यरत थिए र हाल काठमाडौंस्थित सशस्त्र प्रहरीको मुख्यालयमा कार्यरत छन् । पर्सामा कार्यरत रहेका बेला ह्दयघातका कारण निधन भएका सशस्त्र प्रहरी उपरीक्षक स्व. थपलियाको सत्यनिष्ठा, इमानदारी र कर्तव्य परायणताको स्मृतिमा संघले पुरस्कारको स्थापना गरेको अध्यक्ष गौतमले बताए । उनले सुरक्षाकर्मीलाई इमानदार, निस्वार्थ र समर्पित भावनाले काम गर्न प्रोत्साहित गर्ने उद्देश्यले पुरस्कारको स्थापना गरिएको बताए । कार्यक्रममा संघका उपाध्यक्ष आशीषकुमार लाठ, महासचिव शिवजीप्रसाद साह, कोषाध्यक्ष अनोज रूंगटा, सचिव प्रेमचन्द्र गोयल, सह–कोषाध्यक्ष निरज अग्रवाल, सह–सचिव नरेशकुमार टिबडेवाल, प्रशासकीय अधिकृत मनोज उपाध्याय लगायतको सहभागीता थियो ।