वीरगंज , मंसिर – ७
बारा र पर्सा जिल्लाका हैजा प्रभावित क्षेत्रमा सञ्चालन गरिएको खोप अभियान अत्यन्त सफल बनेको छ । दुई चरणमा सम्पन्न अभियानमार्फत झन्डै ९० प्रतिशत स्थानीयवासीले हैजाविरुद्धको खोप लिएका स्वास्थ्य सेवा विभाग, परिवार कल्याण महाशाखाका प्रमुख डा. अभियान गौतमले जानकारी दिए ।
उनका अनुसार बारा जिल्लामा ८८.२५ प्रतिशत अर्थात ३ लाख २२ हजार ९२६ जनाले खोप लिएका छन्। पर्सा जिल्लामा भने ९० प्रतिशत अर्थात ५ लाख ८९ हजार ३५४ जनाले खोप ग्रहण गरेका छन्।
हैजा महामारीविरुद्ध संरक्षण गर्ने उद्देश्यले पहिलो चरण असोज २६–कात्तिक २ र दोस्रो चरण कात्तिक १३–२७ गतेसम्म एक वर्षमाथिका सबै व्यक्तिलाई खोप लगाउने अभियान सञ्चालन गरिएको थियो।
डा. गौतमले यसपटकको खोप अभियान अहिलेसम्मकै उच्च कभरेज भएको बताए । यसअघिका अभियानहरूमा ७०–८० प्रतिशत खोप लगाइने गरेकोमा घरघरमै गएर खोप लगाइएको कारण कवरेज ९० प्रतिशतसम्म पुगेको बताइएको छ ।
गएको भदौमा बारा र पर्सामा हैजाको प्रकोप फैलिएपछि स्वास्थ्य सेवा विभागले बाराका ६ र पर्साका १४ पालिकामा हैजाविरुद्धको खोप अभियान सञ्चालन गरेको हो ।
