वीरगंज , मंसिर – ९
रौतहटको वृन्दावन नगरपालिका–९ भुसाहामा २५ वर्षीया तरीमा खातुनको परिवारकै सदस्यको मिलेमतोमा हत्या गरिएको खुलासा भएको छ । सोमबार राति आफ्नै घरको भुसारेमा खाडल खनी गाडिएको अवस्थामा उनको शव प्रहरीले फेला पारेको हो ।
मृतकका पति शेख आदिल साउदी अरबमा रहेका बेला परिवारका सदस्यहरू फरार भएका छन् । उनीहरूले डेढ वर्षीय मोहम्मद आरिफलाई पनि लिएर भागेको प्रहरी उपरीक्षक रविन कार्कीले जानकारी दिए ।
गत कात्तिक १८ गते माइतीतर्फको विवाह समारोहमा भतिजो पर्ने शेख अलाहुदिनसँग ‘अनैतिक सम्बन्ध’ देखिएको भन्दै परिवारले विवाद गर्दै आएको मृतकका बुबा ताज मोहम्मदले बताए । सोमबार राति सोही विवादका कारण परिवारले हत्या गरेको प्रहरीको प्रारम्भिक अनुमान छ ।
खातुनको दायाँ खुट्टामा गम्भीर चोट तथा टाउकोमा धारिलो हतियार प्रहार भएको प्रहरीले जनाएको छ । शव पोष्टमार्टमका लागि चन्द्रनिगाहपुर अस्पतालमा राखिएको छ भने फरार परिवारजनको खोजी जारी छ ।
