वीरगंज , मंसिर – १३
पुतलीबजार नगरपालिका–४ का वडाध्यक्ष शिवबहादुर थापा स्वास्थ्य उपचारका लागि बाहिर गएको भन्दै २७ महिनादेखि सम्पर्कविहीन बनेका छन्। २०८० भदौ १५ मा कार्यवाहक वडाध्यक्षको जिम्मेवारी वडा सदस्य लिलावती पौडेललाई हस्तान्तरण गरेर थापा बाहिरिएका थिए।
थापाले ‘उपचारका कारण दैनन्दिन रूपमा उपस्थित हुन नसकिने’ भन्दै जिम्मेवारी प्रत्यायोजन गर्नू पर्ने उल्लेखसहित चलानी नं १६७ को पत्र कार्यालयमा बुझाएर हिँडेका थिए। तर त्यसयता उनी विदेश, विशेषगरी अमेरिकामा रहेको बुझिएको छ।
कार्यवाहक वडाध्यक्ष पौडेलका अनुसार, थापाको फर्किने प्रतिक्षामा आफू पनि अनिश्चिततामा बस्नुपर्ने अवस्था छ। “बिरामी भएर केही समय बस्नुपरेको भए पनि जनताको काम रोकिरहँदा चिन्ता लाग्छ। म त वडाको काममै व्यस्त भएर कतै जान पनि पाएकी छैन,” पौडेलले बताइन्।
नगरप्रमुख तुलसीराम रेग्मीका अनुसार नगरपालिका कार्यालयलाई समेत थापाको वास्तविक अवस्थाबारे कुनै आधिकारिक जानकारी छैन। “जिम्मेवारी हस्तान्तरण गरिएको पत्र बाहेक केही औपचारिक खबर नगरपालिकामा आएको छैन,” उनले भने।
यसबिच, थापा भदौ २०८० देखि असार २०८१ सम्म विदेशमै बसे पनि पालिकाले उनको नाममा यातायात, पत्रपत्रिका, मोबाइल रिचार्ज, अतिथि सत्कार, समन्वय सहजीकरण, बैठक तथा अनुगमन खर्च शीर्षकमा रु. २ लाख ७६ हजार १९० भुक्तानी गरेको प्रमुख प्रशासकीय अधिकृत धर्मराज ढुङ्गानाले पुष्टि गरे। उनका अनुसार साउन २०८१ पछि भने सेवा–सुविधा रोकिएको छ।
वडाध्यक्ष थापा नेपाली काँग्रेसबाट निर्वाचित भएका हुन्। पार्टी नगर सभापति सुरजकुमार अधिकारीले ‘पार्टीसँग सल्लाह–सम्पर्क नै नगरी हराएको’ भन्दै असन्तोष व्यक्त गरे।
थापाको लामो गैरहाजिरी र पालिकाले निरन्तर भुक्तानी गरेको विषयले स्थानीय तहमा नैतिकता, जवाफदेहीता र जनप्रतिनिधिको भूमिकाबारे गम्भीर प्रश्न उब्जाएको छ।
