वीरगंज १३ मंसिर । वीरगंज–२२ जगरनाथपुरमा आजदेखि वडाध्यक्ष्F क्रिकेट नकआउट प्रतियोगिता शुरु भएको छ ।
दोस्रो संस्करणको रुपमा जगरनाथपुर क्रिकेट टीमद्वारा आयोजित प्रतियोगिताको उदघाटन २२ नं.का वडाध्यक्ष द्वारिका महतोले गरेका थिए ।
शनिवार १२ बजेदेखि ४ बजेसम्म भएको प्रतियोगिताको उदघाटन खेल वीरगंज–१४ पिपरा क्रिकेट टीम र आयोजकबीच भएकोमा २३ रनले जगरनाथपुर क्रिकेट टीम पिपरालाई हराएको छ ।
जगरनाथपुरले टस जितेर पहिलो ब्याटिङ गर्दा निर्धारित २० ओभरको खेलमा सबै विकेट गुमाई कुल १२३ रन बनाएको थियो भने १२४ रनको विजयी लक्ष्य लिएर मैदानमा उत्रेको पिपराको टीमले खेल सकिनुभन्दा एक बल अगावै सबै विकेट गुमाउँदै मात्र १०० रनमा समेटिएको थियो ।
प्रतियोगिताको म्यान अफ दि म्याच जगरनाथपुरका मुन्ना यादव घोषित भएका छन् । यो प्रतियोगितामा जगरनाथपुर आसपासका आठवटा टीमको सहभागिता रहेको छ ।
आइतवारको प्रतियोगिता संसारीमाई क्रिकेट टीम परवानीपुर र एसआरएसटी वीरगंजबीच आयोजना हुनेछ । प्रतियोगिताको फाइनल मंसिर २० गते शनिवारका दिन हुने आयोजकले जनाएको छ ।
यस प्रतियोगिताको प्रथम पुरस्कार रु ५१ हजार नगद, उपविजेतालाई रु २५ हजार नगदसहित ट्रफी, मेडल, प्रमाणपत्र प्रदान गरिनेछ । अन्य सहभागी टीमहरुमा गण्डक बहुअरी, सन्जु–११ धोरे, टाम्बाश्री नेपाल लक्ष्मणवा र कालिकामाई क्रिकेट टीमहरु रहेका छन् ।
प्रतियोगिताको प्रथम संस्करण आयोजकले जितेको थियो ।
