वीरगंज, १३ मंसिर । सशस्त्र प्रहरी बल नेपाल पर्साले भारतबाट अवैध रुपमा भन्सार छली गोदाममा भण्डारण गरेको अवस्थामा १५० क्यारेट केरा बरामद गरी भन्सार दाखिला गरेको छ ।
सीमा सुरक्षा गुल्म बीरगंज र बीरगंज भन्सार कार्यालयबाट खटिएको संयुक्त टोलीले बीरगंज महानगरपालिका वडा नं १५, भिष्वा स्थित एन.एम.सी. रोडस्थित मनिष फ्रुट सप्लायर्सको गोदाममा शम्भु कुमार गुप्ताले भारतबाट भन्सार छली गरी भण्डारण गरिराखेको १५० क्यारेट केरा नियन्त्रणमा लिएको सशस्त्र प्रहरी बल, नेपाल नं. १३ गण हेड क्वार्टर पर्साका सूचना अधिकारी सशस्त्र प्रहरी नायब उपरीक्षक विश्वराज योन्जनले जनाएको छ ।
बरामद केरा आवश्यक कारबाहीको लागि बीरगंज भन्सार कार्यालयमा बुझाएको प्रवक्ता योन्जनले जनाएका छन् ।
नेपालमा किसानहरूले उत्पादन गरेको कृषिजन्य उपजहरूको उचित मुल्य नपाएको तथा भारतबाट आयात गरिएको फलफुल तथा तरकारीहरूले मात्र बजार ओगटिरहेको गुनासोको आधारमा सीमा क्षेत्रमा तैनाथ सशस्त्र प्रहरी बल नेपालले अवैध रूपमा भन्सार छली ल्याएका सामानहरूलाई नियन्त्रण कार्यलाई तिव्रता दिदै आइरहेको प्रवक्ता योन्जनले जनाएका छन् ।
उनले चोरी तस्करी लगायतका सीमा अपराध नियन्त्रण गर्ने कार्यलाई अभियानकै रूपमा संचालन गरिरहेको सशस्त्र प्रहरी बल नेपाल पर्साले आगामी दिनमा अझ प्रभावकारी रूपमा संचालन गरी राजश्व अभिबृद्धिमा समेत टेवा पुर्याउने जनाएको छ ।
