वीरगंज , मंसिर – १३
पर्सामा शनिबार ‘शिक्षा पत्रकार समूह’ गठन गरिएको छ। नेपाल पत्रकार महासंघ पर्साको सभाकक्षमा आयोजित समारोहमा महासंघ पर्साका अध्यक्ष ओमप्रकाश खनालले प्रमोद यादवको अध्यक्षतामा नयाँ समिति घोषणा गरे।
नवगठित समूहमा उपाध्यक्ष राजेन्द्र सिंह नेपाली, सचिव माधुरी महतो, सहसचिव बलिराम यादव र कोषाध्यक्ष राजकुमारी यादव चयन भएको छ। सदस्यमा आंशु सर्राफ, विनोद यादव, अनिता कुँवर, एन्जल चौधरीलगायत छन्। सल्लाहकारमा शंकर आचार्य, तुलसी भण्डारी, भूषण यादव, क्रान्ति शाह र विजय महतो मनोनयन गरिएको छ।
सम्बोधन गर्दै नेपाल शिक्षक महासंघ पर्साका अध्यक्ष तीर्थराज यादवले सामुदायिक विद्यालयको भौतिक संरचना लोकतन्त्रपछि उल्लेखनीय रूपमा सुधारिए पनि विषयगत शिक्षकको अभावले शिक्षाको स्तरोन्नति बाधित रहेको टिप्पणी गरे। उनले ‘युट्युबर आतंक’ ले शिक्षकमा अनावश्यक दबाब सिर्जना भई पठन–पाठनमा नकारात्मक असर परेको दाबी गरे। त्यस्तै, केही जनप्रतिनिधिले योग्यताविहीन व्यक्तिलाई ईसीडी शिक्षकमा नियुक्त गर्ने प्रवृत्तिले समस्या थप जटिल बनिरहेको बताए।
कार्यक्रममा उपप्राध्यापक डा. सुष्मा तिवारीले २०४६ सालपछि शिक्षामा पहुँच विस्तार भए पनि राज्यको लगानी उल्टो घट्दै गएको बताइन्। उनका अनुसार मधेस प्रदेशको साक्षरता दर ६९ प्रतिशत मात्र रहेको छ, जुन सातै प्रदेशमध्ये सबैभन्दा कम हो। पर्सा र वीरगन्जका विद्यालयमा शिक्षक अभाव, अपांगता–मैत्री पूर्वाधारको कमी, शौचालय समस्यादेखि प्रयोगविहीन अवस्थामा रहेका कम्प्युटरसम्मका चुनौती गम्भीर बनेका छन्।
समारोह शिक्षा पत्रकार समूहका अध्यक्ष प्रमोद यादवको सभापतित्व र शिक्षा विकास तथा समन्वय इकाइ पर्साका प्रमुख मोती प्रसाद भट्टराईको प्रमुख आतिथ्यमा सम्पन्न भएको थियो। कार्यक्रममा नेपाल शिक्षक महासंघ वीरगन्जका अध्यक्ष प्रदीप जयसवाललगायत सरोकारवालाको सहभागिता थियो।
