वीरगंज, मंसिर १४ /
औषधि ऐन, २०३५ को दफा ११ को उपदफा ५ मा गरिएको संशोधन खारेज गर्नुपर्ने मागसहित वीरगंजका औषधि व्यवसायीले लगातार चौथो दिन धर्ना जारी राखेका छन् ।
नेपाल औषधि व्यवसायी संघको नेतृत्वमा व्यवसायीहरू आज पनि औषधि व्यवस्था विभागको क्षेत्रीय कार्यालय वीरगंजको मुख्यद्वार अगाडि दुई घण्टासम्म धर्नामा बसे । उनीहरूले हातमा प्लेकार्ड बोकी संशोधनविरुद्ध नाराबाजी गर्दै यसले आफ्नो पेशा नै संकटमा पारेको आरोप लगाए ।
संघले मंसिर ११ गतेदेखि चरणबद्ध आन्दोलन घोषणा गर्दै देशभर विरोध कार्यक्रम सञ्चालन गर्दै आएको छ । सोही अभियानअन्तर्गत पर्सामा रहेका व्यवसायीले पनि निरन्तर धर्ना जारी राखेका छन् ।
व्यवसायीहरूले माग सुनुवाइ नभए संघर्षका थप कार्यक्रम अघि बढाइने चेतावनी दिएका छन् ।
Facebook Comments Box
