वीरगंज , मंसिर – १४
बिरगंज–रक्सौल जोड्ने ऐतिहासिक मितेरीपुल क्षेत्रमा आज नेपाल–भारत मित्रता सुदृढ गर्ने उद्देश्यसहित संयुक्त सरसफाइ तथा वृक्षारोपण कार्यक्रम सम्पन्न भएको छ । बिरगंज महानगरपालिकाको आयोजनामा, सशस्त्र प्रहरी बल नेपाल, जिल्ला प्रहरी कार्यालय पर्सा, ग्रीन सिटी सामुदायिक प्रहरी सेवा केन्द्र आदर्शनगर र भारतीय सुरक्षा बल—एसएसबी ४७ बटालियनको सक्रिय सहभागितामा कार्यक्रम सम्पन्न गरिएको हो ।
सरसफाइ अभियानले मितेरीपुल आसपासको क्षेत्रलाई थप सफा र व्यवस्थित बनाएको छ भने वृक्षारोपणमार्फत सीमाक्षेत्रलाई हराभरा, वातावरणमैत्री र सुरक्षित बनाउने लक्ष्य अघि बढाइएको छ ।
ग्रीन सिटी सामुदायिक प्रहरी सेवा केन्द्र आदर्शनगरका अध्यक्ष जयप्रकाश खेतानको अध्यक्षता र
सशस्त्र प्रहरी भन्सार गुल्मका डिएसपी पुरुषोत्तम भण्डारी आतिथ्यतामा सम्पन्न कार्यक्रममा एसएसबी ४७ बटालियनका कमाण्डिङ अफिसर संजय रावत , डिपुटी कमाण्डेन्ट दीपक कृष्णा , डिपुटी कमाण्डेन्ट नवीन कुमारसहित दुवै देशका सुरक्षा अधिकारी तथा विभिन्न निकायका प्रतिनिधिहरूको उपस्थिति थियो ।
सहभागी सबैजनाले सीमाक्षेत्रलाई स्वच्छ, सुरक्षित र हराभरा राख्न यस्ता संयुक्त अभियानलाई नियमित रूपमा निरन्तरता दिइने प्रतिवद्धता व्यक्त गरेका छन् । दैनिक ३५ देखि ४० हजार मानिसको आवत–जावत हुने यो सीमाक्षेत्र दुवै मुलुकबीचको प्रेम, सद्भाव र मित्रताको प्रतीकका रूपमा चिनिन्छ ।
