वीरगंज, १४ मंसिर । टी–२० च्यालेञ्ज–वीरगंज स्कूल कप २०८२ अन्तर्गत आइतवार सम्पन्न तेस्रो दिनको पहिलो खेलमा अल्पाइन सेकन्डरी स्कूललाई पराजित गर्दै कादम्बरी एकेडेमी विजयी भएको छ भने दोस्रो खेलमा ग्रीन ल्यान्डले ज्ञानोदय सेकेन्डरी स्कूललाई पराजित गरेको छ ।
पहिलो खेलमा टस जितेर ब्याटिङ गरेको अल्पाइनको खेलाडीहरु कादम्बरीका बलरहरूको कडा आक्रमणका कारण निर्धारित ११.४ ओभरमै ५७ रनमा समेटिएको थियो । कादम्बरीले १२.१ ओभरमा ७ विकेट गुमाउँदै ६१ रन पु¥याउँदै ३ विकेटले विजयी भएको छ । कादम्बरीका दिव्यांशु पटेल उत्कृष्ट बलिङ प्रदर्शन गर्दै ‘म्यान अफ द म्याच’ घोषित भए । उनले २.४ ओभरमा ९ रन खर्चेर ३ विकेट लिएका थिए।
दोस्रो खेलमा ग्रीन ल्याण्ड सेकन्डरी स्कूलले टस जितेर पहिले ब्याटिङ गर्दै २० ओभरमा ९ विकेटको क्षतिमा १२५ रनको प्रतिस्पर्धात्मक स्कोर बनायो । जवाफी ब्याटिङ गर्न आएका ज्ञानोदय सेकन्डरी स्कूलका खेलाडीहरू नियमित अन्तरालमा विकेट गुमाउँदै १५.२ ओभरमै ७३ रनमा अल आउट हुँदै ५२ रनले पराजित भए ।
ग्रीन ल्याण्डका सोयब आलम १२ रन तथा ४ विकेटको उत्कृष्ट प्रदर्शनसहित ‘म्यान अफ द म्याच’ घोषित भए। त्यसैगरी ज्ञानोदयका बलर सुरज कुमारले ५ विकेट लिएर ‘म्याच बल अवार्ड’ हात पारे ।
समूह ‘ए’का खेल सकिएपछि ग्रीन ल्याण्ड सेकन्डरी स्कूल समूह विजेता तथा विद्या सदन सेकन्डरी स्कूल उपविजेता हुँदै सेमिफाइनलमा प्रवेश गरेका छन् ।
चौथो दिनको अन्तिम लिग खेलहरू पहिलो खेल (बिहान ९ः०० बजे)कादम्बरी सेकन्डरी स्कूल–बाल एकता सेकन्डरी इंग्लिस बोर्डिङ स्कूल, दोस्रो खेल (१२ः०० बजे) अल्पाइन सेकन्डरी स्कूल–साउथ जोन सेकन्डरी स्कूल नारायणी क्रिकेट ग्राउन्डमा हुने आयोजकले जनाएको छ ।
