टोकियो , २७ माघ –
जापानकी प्रधानमन्त्री साने ताकाइचीले संसदीय चुनावमा आफ्नो पार्टी लिबरल डेमोक्रेटिक पार्टी (एलडिपी) ले दुईतिहाई बहुमत जितेसँगै सुरक्षा, अर्थतन्त्र, आप्रवासन र सामाजिक नीतिमा व्यापक रूपान्तरण अघि बढाउने तयारी शुरू गरेकी छन्।
सोमवार उनले मन्त्रिपरिषद् पुनः गठन गर्ने र ढिलाइ भएको बजेट अघि बढाउने प्रक्रिया शुरू गरेकी छन्। मतगणनाका अनुसार एलडिपीले ३१६ सिट जित्दै ४६५ सदस्यीय तल्लो सदनमा सहज बहुमत हासिल गरेको छ। गठबन्धनसहित सत्तारुढ पक्षको कुल सिट संख्या ३५२ पुगेको छ।
उनी आगामी हप्ता हुने मतदानमार्फत प्रधानमन्त्रीका रूपमा पुनः चयन हुने अपेक्षा गरिएको छ। ताकाइचीले एनएचकेसँगको अन्तर्वार्तामा आफ्नो प्रयासले जापानलाई बलियो र समृद्ध बनाउने विश्वास व्यक्त गरेकी छन्।
माथिल्लो सदनमा पूर्ण बहुमत नभए पनि तल्लो सदनको बलियो समर्थनले अर्थतन्त्र र सैन्य क्षमताको विस्तारको एजेन्डा अघि बढाउन सहज बनाएको विश्लेषकहरू बताउँछन्। चीनसँग बढ्दो तनाव र अमेरिकासँग सम्बन्ध सुदृढ गर्ने प्रयासबीच उनले विपक्षीसँग संवाद गर्दै नीतिगत लक्ष्य अघि बढाउने योजना बनाएकी छन्।
प्रधानमन्त्रीको लोकप्रियता, युवा मतदातासँगको प्रभाव, र विभाजित विपक्षी दलको कमजोरीले ताकाइचीलाई राजनीतिक बलियो स्थिति दिएका छन्। उनले ढिलाइ भएको बजेट पारित गर्दै बढ्दो लागत र ज्यालासम्बन्धी समस्या समाधान गर्ने योजना बनाएकी छन्। सुरक्षा, रक्षा नीति संशोधन, हतियार निर्यात प्रतिबन्ध हटाउने र रक्षा खर्च बढाउने कदमले दीर्घकालीन रूपान्तरणको संकेत दिन सक्छ।
विश्लेषकहरूका अनुसार यी कदमले जापानको आन्तरिक ध्रुवीकरण, नागरिक अधिकार र क्षेत्रीय कूटनीतिमा गम्भीर बहस जन्माउन सक्छ।
