वीरगंज । पर्सा निर्वाचन क्षेत्र नं. ३ अन्तर्गत बहुदरमाई नगरपालिका वडा नं. ८ रामनगरीमा नेपाल कम्युनिष्ट पार्टी (एमाले) काे क्षेत्रीय सम्पर्क कार्यालय सञ्चालनमा आएको छ।
– Advertisement –
कार्यालयकाे बुधबार आयोजित एक कार्यक्रमका बीच प्रतिनिधिसभा सदस्यका उम्मेदवार रुपेश कुमार पाण्डेले उद्घाटन गरेका हुन्। उद्घाटन गर्दै उम्मेदवार पाण्डेले आफू निर्वाचित भए सधैं जनताकाे साथमा रहने प्रतिबद्धता व्यक्त गरे ।
उनले जनताकाे सेवा गर्ने उद्देश्यले राजनीतिमा आएको उल्लेख गर्दै क्षेत्रकाे विकासका लागि कुनै कसर बाँकी नराख्ने विश्वास दिलाए । “आफ्नाे मत दिएर निर्वाचित गराउनुस्, म तपाईहरूकाे विश्वास कहिल्यै खेर जान दिने छैन,” उनले भने । यहाँकाे जीवनस्तर उकास्न शिक्षा, स्वास्थ्य, कृषि लगायतका क्षेत्रकाे विकास आफ्नाे पहिलो प्राथमिकता रहने पाण्डेले बताए ।
कार्यक्रममा एमालेका केन्द्रीय सदस्य प्रभु हाजरा, विजय सरावगी, पर्सा जिल्ला अध्यक्ष डा. बिश्वम्भर शर्मा, प्रदेशसभा सदस्य प्रमोद जयसवाल, पूर्व प्रदेशसभा सदस्य प्रह्लाद गिरी, बहुदरमाई नगरपालिकाका मेयर सिंगासन साह तेली, सखुवा प्रसाैनी गाउँपालिकाका अध्यक्ष यसवन्त यादव, पूर्व अध्यक्ष प्रदिप जयसवाल, नेता शिव पटेल, मंजुर अन्सारी, तेजप्रकाश निषाद लगायतकाे उपस्थिति रहेको थियो।
