वीरगंज, ५ फागुन –
कञ्चनपुरको दोधारा चाँदनी नगरपालिका–४ मा मंगलबार राति एक व्यक्तिले आफ्नै परिवारमाथि साङ्घातिक आक्रमण गर्दा ७५ वर्षीया आमाको ज्यान गएको छ। स्थानीय ५५ वर्षीय हरि प्रसाद श्रेष्ठले धारिलो हतियार प्रहार गरी आमा बिन्द्रा श्रेष्ठको हत्या गरेका हुन्।
घटनामा उनकी ५० वर्षीया बहिनी भगवती देवी माझी गम्भीर घाइते भएकी छन्। टाउको र हातमा गहिरो चोट लागेकी उनको महाकाली प्रादेशिक अस्पतालमा उपचार भइरहेको प्रहरीले जनाएको छ।
प्रहरीको प्रारम्भिक अनुसन्धानअनुसार जग्गा–जमिनसम्बन्धी पुरानो घरायसी विवादका कारण घटना भएको देखिएको छ। श्रेष्ठले राति करिब पौने ९ बजे आक्रमण गरेको बुझिएको छ।
घटनापछि फरार रहेका श्रेष्ठको खोजीका लागि जिल्ला प्रहरी कार्यालय कञ्चनपुरले सीमा क्षेत्रसहित विभिन्न स्थानमा टोली परिचालन गरी अनुसन्धान तीव्र पारेको जनाएको छ।
