वीरगंज, ८ साउन । पर्सा जिल्लामा एक महीनाको अवधिमा जन्मसिद्ध नागरिकका २५८१ जना सन्तानले नागरिकता लिएका छन् ।
नयाँ नागरिकता ऐन अनुसार जिल्ला प्रशासन कार्यालय पर्साबाट एक महिनाको अवधीमा जन्मसिंद्ध नागरिकका २ हजार ५८१ जना सन्तानले बंशजको नागरिकता लिएको सहायक प्रमुख जिल्ला अधिकारी भीमकान्त पौडेलले बताएका छन् ।
नेपाल नागरिकता (पहिलो संशोधन) ऐन २०७९ लागु भएपछि जिल्ला प्रशासन कार्यालय पर्साले गत असार ८ गतेदेखि जन्मसिंद्ध नागरिकका सन्तानलाई बंशजको नागरिकता दिने प्रकृया शुरू गरेको थियो । असार ८ देखि प्रकृया शुरू गरि असार १० गतेदेखि नागरिकता वितरण शुरू गरिएकोमा साउन ७ गते आइतवारसम्म २ हजार ५८१ जनाले बंशजको नागरिकता लिएको पर्साका सहायक प्रमुख जिल्ला अधिकारी भीमकान्त पौडेलले जानकारी गराए । तीमध्ये पुरूष १ हजार ९६७ र महिला ६ सय १४ जना रहेको पौडेलले बताए ।
यसै अवधिमा ७ हजार ७८२ जना आवेदन दिएकोमा आइतवारसम्म २ हजार ५८१ जनालाई बंशजको नागरिताका वितरण गरिसकिएको सहायक प्रजिअ पौडेलले बताए ।
