वीरगंज , ४ जेठ –
पर्सा प्रहरीले खैरो हेरोइनसहित दुई जनालाई पक्राउ गरेको छ ।
पक्राउ पर्नेमा वीरगञ्ज महानगरपालिका–३२ का २० वर्षीय राहुल सिंह र बाराको जितपुरसिमरा उपमहानगरपालिका–७ का १९ वर्षीय नन्दन गुप्ता रहेका छन् ।
जिल्ला प्रहरी कार्यालय पर्साका डीएसपी हरिबहादुर बस्नेतका अनुसार वीरगञ्ज–३१ स्थित कटगेनवा सडकखण्डबाट उनीहरूलाई पक्राउ गरिएको हो । उनीहरूको साथबाट ८ ग्राम ४० मिलिग्राम खैरो हेरोइन बरामद भएको प्रहरीले जनाएको छ ।
ना ३९ प २५३२ नम्बरको मोटरसाइकलमा भेडियाहीबाट मिलनचोकतर्फ आउँदै गरेका बेला प्रहरीले उनीहरूलाई नियन्त्रणमा लिएको हो । पक्राउ परेकामाथि लागुऔषध मुद्दामा अनुसन्धान भइरहेको प्रहरीले जनाएको छ ।
